Lavrov: Amerîka dixwaze li Sûriyê çend hikûmetan ava bike

Wezîrê Derve yê Rûsya Sergey Lavrov rexne li siyaseta Amerîkayê ya derbarê Sûriyê de girt û ragihand, pêvajoya Astans ya ji bo çareserkirina krîza Sûriyê bi dilê lîstikvanên derve nîne û ew dixwazin li Sûriyê mîrnişînên biçûk bidin avakirin.

Di civîna her sê  wezîrên derve yên Rûsya, Îranê û Tirkiyê de ku îro li bajarê Astana ya paytexta Kazaxistanê birêve çû, Wezîrê Derve yê Rûsyayê Sergey Lavrov tekezî li ser berdewambûna hewlên welatê xwe bi alîkariya Tirkiyê û Îranê bo çareserkirina pirsgirêkên li Sûriyê kir.

Sergey Lavrov amaje bi serkevtina şerê li dijî terorê û grûpên çekdarî yên li Sûriyê kir û tekezî li ser piştgiriya Moskowê bo Şamê di şerê li dijî terorê de kir.

Lavrov rexne li siyaseta Amerîkayê ya li hember Sûriyê girt û got, Amerîka li Sûriyê di şerê li dijî terorê de hevkariya wan nake û hewl dide Sûriyê parçe parçe bike. Lavrov diyar kir, pêvajoya Astans ya ji bo çareserkirina krîza Sûriyê bi dilê lîstikvanên derve nîne û ew dixwazin li Sûriyê mîrnîşînên biçûk bidin avakirin.

Lavrov got: “Pêvajoya serkeftî ya parastina yekparçeyiy xaka Sûriyê ne bi dilê hemû lîstikvanên derveye .Yên ku hemû normên Navdewletî binpê dikin, bi taybetî jî biryara 2254 a Encûmena Asayişa Navdewletî ya Netewên Yekgirtî.

Ev jî eşkere ye, riya xwe rast girtine daku Sûriyê parçe parçe bikin, deshilatê biguhirên û li cihê wê welatê girîng ê Rojhilata Navîn, mîrnîşînên biçûk û biçûk bidin avakirin, yên ku dê di bin kontrola lîstikvanên derve de bin û bêguman ew pêşwaziya wê yekê nakin, tiştê ku em niha li Astana dikin.”

Wezîrê Derve yê Rûsyayê destnîşan kir, ku pêvajoya hevdîtinên Astana ji bo xelkê Sûriyê hêviyê çê dike û tekezî li ser wê çendê kir, ku Rûsya, Tirkiye û Îran bi hewlên xwe yên dîplomatîk û di çarçoveya pêvajoya Astana de formatek guncaw bo çareserkirina qeyrana Sûriyê dîtine.

Sergey Lavrov li ser wê mijarê da xuyakirin:“Dema ku di medyayê de behsa pêvajoya Astana tê kirin û behsa paytexta Kazaxistanê tê kirin, bi miliyonan Sûrî berê xwe bi hevîyeke mezin didine şaşên televîzyona û dinihêrin wê li Astana çi rû bide.

Salek beriya niha ev pêvajo Astana Rûsya,Îran û Tirkiyê ,bi hewlen deplomatîk û siyasî da destpêkirin û wê formatê xwe îsbat kir, ku ew ketiye rêyeke rast ji bo ku rewşa Sûriyê normal bibe. Di vê mijarê de ez naxwazim bêjim me çendî destkevt bi dest anîne.”