Tirkiye niyeta xwe ya li hember Efrînê eşkere kir

Berdevkê Serokomariya Tirkiyê Îbrahîm Kalin ragihand, Tirkiye piştî kontrolkirina Efrînê, wê herêmê radestî hikûmeta Sûriyê nake.

Îbrahîm Kalin îro di daxuyaniyeke rojnamevanî de ragihand, hêzên Tirkiyê di çarçoveya Operasyona Çiqla Zeytûnê de %70ê herêma Efrînê kontrol kirine û diyar kir, ku di demeke nêzîk de ew dê navenda bajarê Efrînê jî kontrol bikin.

Kalin derbarê Minbicê de jî got, ku Tirkiye û Amerîka li ser rewşa Minbicê li hev kirine û got, li gorî nexşerêya Waşington û Enqerê dê Minbic bibe devereke aram û li sînorê Minbicê herêmeke ewle were avakirin.

Berdevkê Serokomariya Tirkiyê amaje bi ji kar dûrxistina Rex Tillerson ji posta Wezîrê Derve ya Amerîkayê jî kir û got, guhertina Rex Tillerson û hatina Mike Pomeo bo ser wezareta derve ya Amerîkayê bandorê li ser rêkevtina Waşington û Enqerê ya derbarê Minbicê de nake.

Îbrahîm Kalin destnîşan kir, divê Amerîka pabendî rêkevtina li ser Minbicê be.

Kalin da xuyakirin, PKKê û YPGê dixwastin ku Efrînê bikin Qendîleke din, lê bi Operasyona Çiqla Zeytûnê ew yek hat betalkirin.