Kolberekî Kurd ji ber sir û seqemê canê xwe ji dest da

Kolberê Kurd ê xelkê bajarê Şinoyê jiber sir û seqemê, di çiyayê “Şetre” de canê xwe ji da.

Li gorî zaniyariyan roja Çarşemê 15`ê Sermawêza 1396`an, hejimarek ji kolberên Kurd, li sînorên Kurdistanê, di çiyayê “Şetre” de, rastî ba û bahozê dibin û di encamê de jî kolberê Kurd yê bi navê “Êdrîs Bayezîd” temen 25 salî xelkê gundê “Sîngan” a ser bi bajarê Şinoyê jiyana xwe ji dest da.

Çavkaniyeke haydar li cihê bûyerê diyar kiriye ku termê wî kolberê Kurd, ji aliyê xelkê vê deverê ve hatiye dîtin, û kolberên din jî ku sirrêbirî bûne, ji bo çareseriya pizîşkî bo navendên dermanî hatine şandin.

Hatina demsala sirrê û barîna berfa zef, yek ji wan metirsiyan e di sînorên Kurdistanê de, ku kolberên Kurd digel de berbirû dibin.

Barên kolberan, kelûpel û tiştên taybet bi karê bazerganiya bajarên mezin yên Îranê ne, ku di derveyî yasaya gumrikê tê encamdan.