Pûtîn: Em ji bo Îspanyayê nîgeran in

Serokê Dewleta Rûsyayê Vladîmîr Pûtîn derbarê referandûma serxwebûnê ya Katalonyayê de axivî û got, "em ji bo Îspanyayê gelekî nîgeran in".

Pûtîn di merasîma qebûlkirina nameyên balyozên gelek welatan de di derbarê referandûma Herêma Xweser a Katalonyayê ya Îspanyayê de jî axivî.

Serokê rûs derbarê referandûma ku 90% ji gelê Katalonyayê dengê erê tê de daye de got: Ez vê veneşêrim; Em ji bo Îspanyayê nîgeran in. Lê helbet, em meseleya navxweyî ya qiraliyeta Îspanyayê ye."

Herwiha Pûtîn got, "em hêvî dikin ev qeyran were çareserkirin."

Madrîdê ew referandûm wek "neqanûnî" bi nav kiribû û gelek polîs şandibûn Katalonyayê ku wan jî destwerdaneke tund kiribû. Polîsan bêtirî 900 kesî birîndar kiribûn.

Hêjayî gotinê ye ku beşeke mezin ê Katalonayyê îro dikeve grevê.

Derbarê kêşeya Qibrisê de jî, Pûtîn diyar kir ku ew piştgirê wê yekê ne ku kêşe li ser bingehê biryarên Konseya yê NYyê were çareserkirin.