یەکێتی لە پێشنیارەوە بۆ بڕینی موچە

یەکێتی لە هەموو ئاستەکانیەوە، لە هاوسەرۆک و سەرکردایەتی و پەڕلەمانتار و میدیایەکەیەوە زیاتر لە سێ ساڵ بوو، ببووە درێژکراوەی ئەو دەنگانەی لە بەغدا حکومەتی کوردستانیان تۆمەتبار دەکرد بەوەی داهاتەکانی کوردستان بە نەوتی و نا نەوتی رادەست ناکا، بۆیە بەغدا موچە نانێری.
حکومەتی هەرێمی کوردستان چەند مانگێکە لەگەڵ بەغدا رێکەوتووە و هەموو رۆژێک ئەوە دووپات دەکاتەوە کە ئامادەیە بۆ جێبەجێکردنی یەک بە یەک خاڵەکانی رێکەوتنەکە، بەڵام بەغدا نە نەوتەکەی لێ وەردەگرێ و نە پارە دەنێرێ، ئەوەش ئەو راستەقینەیە دەسەلمێنێ کە پرسی بڕینی پارەی کوردستان لەلایەن بەغداوە سیاسیە و هێزە شیعییەکان وەک کارتێک بۆ بێهێزکردنی قەوارەی دەستووری هەرێمی کوردستان بەکاری دەهێنن.
حکومەتی هەرێمی کوردستان بە جێبەجێکردنی یاسای چاکسازی و بە کەمکردنەوەی خەرجی و زۆرکردنی داهات توانی خەڵکی کوردستان لە بن منەتی بەغدا دەربێنێ و بۆ چوار مانگ لەسەر یەک موچە لە کاتی خۆی دابەش بکات(بە لێبڕینەوە).
یەکێتی چەند مانگێکە سەرلەنوێ دەستی بەسەر داهاتی دەروازە سنووریەکان و داهاتەکانی دیکەی پارێزگای سلێمانی گرتۆتەوە و لە جیاتی ئەو داهاتە بچێتە گەنجینەی وەزارەتی دارایی و بکرێتە موچە و بدرێتە فەرمانبەران، ئەوە دەچێتە خەزێنەی هاوسەرۆکەکانی یەکێتی و دارایی گشتی یەکێتی، یەکێتی بۆ دوو مەبەست پەنای بردۆتەوە بەر ئەو کارە:
یەکەمیان، گرفت دروست کردنە بۆ حکومەتی هەرێمی کوردستان تا نەتوانێ موچەی فەرمانبەرانی بدا و بەوەش پێگەی حیزبی سەرەکی و پێکهێنەری حکومەت کە پارتیە لە رووی جەماوەریەوە لاواز بکات، بە تایبەتیش کە بەرەو هەڵبژاردنی پێشوەختەی پەڕلەمانی عێڕاق دەچین، هەندێک زانیاریش هەیە کە ئەو داهاتەی کە بە نزیکەی 100 ملیۆن دۆلار مەزندە دەکرێ یەکێتی بۆ کڕینی وەلائی ژمارەیەک سەرۆک عەشیرەت لە سنووری پارتی بەکاربهێنێ.
دووەمیان، ئەو کارەی یەکێتی بە هەماهەنگیە لەگەڵ هێزە شیعییەکانی سەر بە ئێران کە بەو کارەی حکومەتی کوردستان نارەحەتن لەوەی توانی بۆ چوار مانگ لە سەر یەک موچە لە کاتی خۆی بدا بەبێ هەڵگرتنی منەتی بەغدا، بۆیە شیعەکان دەیانەوێ لە رێگای یەکێتیەوە فشار لەسەر حکومەتی هەرێمی کوردستان و لە رێگەشیەوە لە سەر پارتی دروست بکەن، کە ناچار بێ و مل بۆ داواکانی ئێران بدا و بچێتە ناو بەرەی ئێران، ئەگەر نا لایەنی کەم نەچێتە ناو ئەو بەرەیەی کە چاوەڕوان دەکرێ لە دژی ئێران لەلایەن هەندێک هێزی شیعی و سوونی بە پاڵپشتی ئەمریکا و ئەوروپا پێکبهێندرێ.
یەکێتی کە بۆ دەسکەوتێکی حیزبی و دڵڕاگرتنی ئەو هێزانەی لە بەغدا هاوکاری دەکەن بۆ ئەوەی لەوەی ئێستا هەیە لاوازتر نەبێ، بە ئاشکرا بۆتە بەشێک لەو هێزانەی خەڵکی کوردستان برسی دەکەن و موچەی فەرمانبەرانی دەبڕن تەنها بۆ ئەوەی کورد بەرامبەر شیعە لاواز ببێ و بە هەموو مەرجەکانیان رازی بێت. یەکێتی بڕوا ناکەم لەو کارەی لە ڕووی جەماوەریەوە سەرکەوتوو بێ چونکە سەرنجی خەڵکی کوردستان بۆ ئەو راستەقینەیە رادەکێشنەوە کە ئەگەر یەکەمجار یەکێتی پێشنیاری بۆ بەغدا(مالیکی) کردبێ کە موچە و بودجەی کوردستان ببڕێ، ئەوە ئێستا یەکێتی بە دەستی خۆی و بە شێوەیەکی راستەوخۆ و بەبێ منەت بودجە و موچەی خەڵک دەبڕێ.

یەکێتی لە پێشنیارەوە بۆ بڕینی موچە

ئاسۆ حاجی

ڕیکلام