دواین نامەی یٔـێـران بۆ عـێـراق و کـوردستان

هاتنی زەریف بۆ بەغدا و هەولێر یەک پەیامی ئێرانی هەبوو بە سێ ئاراستەی جیاواز:
ئاراستەی یەکەم، یەکخستنەوەی ماڵی شیعە و مسۆگەرکردنەوەی عێڕاقێک کە لە باخچەی پشتەوەی بەرژەوەندیەکانی ئێران زیاتر نەبێ.
ئاراستەی دووەم، هێشتنەوەی سوننە بەو پەرتەوازیەی هەیە و زیاتر پەرێشان کردنیان تا نە سعودیە و ئیمارات و نە ئوردن و تورکیا بە قیت کردنەوەیان رانەگەن نەک یەکخستنەوەیان.
ئاراستەی سێیەم، هەوڵدان بۆ لێک نزیک کردنەوەی هێزە کوردستانیەکان بەتایبەتی یەکێتی و پارتی، ئەو پەیامە بەر لە هاتنی زەریفیش یەکێتی لەسەر زاری بافێل تاڵەبانی لە کۆبوونەوەی سەرکردەی پارتە کوردستانیەکان لەگەڵ سەرۆکی هەرێم باسی لێوە کرا بوو.
زەریف لە هەولێر چەند پەیامێکی جیاوازی بۆ سەرکردایەتی سیاسی کوردستان جێهێشت:
پەیامی یەکەمی، بۆ سەرۆکایەتی هەرێمی کوردستان و سەرۆکایەتی حکومەتی کوردستان بوو کە ئێران ئەو هێزەیە کە دەتوانێ بەغدا ناچار بکات بەوەی شایستە داراییەکانی هەرێمی کوردستان بدا وەک ئەوەی لە یاسای بودجە دا هاتووە.
پەیامی دووەم، تایبەت بوو بە یەکێتی، لە تویتەکەشی بە روونی دیار بوو کە ئاماژەی بە دیداری خۆی تەنها لە گەڵ بافێل تالەبانی و قوباد تاڵەبانی کردبوو و ناوی لاهور جەنگی هاوسەرۆکی یەکێتی فەرامۆش کردبوو، ئەوەش نامەیەکی کراوە و روون و ئاشکرا بوو کە لەلای ئێران کوڕانی مام جەلال خاوەنی یەکێتین.
پەیامی سێیەم، بۆ هێزە سیاسیە کوردستانی و عێڕاقیەکان بوو، کە ئەوان مەسعود بارزانی وەک لێڤەگەڕی پرسی کوردستانی دادەنێن و هەوڵدەدەن دۆستایەتیان لەگەڵی لە جاران بەهێزتر بکەنەوە.
لەبەرامبەر ئەو پلان و نەخشەیەی ئێران ئەمەریکا هەیە کە پازدە ساڵە لە بەرمبەر ئێران لە دۆڕان بەردەوام دایە، لە دوای سوریا و یەمەن و لوبنان عێڕاقیشی لەسەر خوانچەی زێڕین پێشکەشی ئێران کرد و سوننە و کوردی کردنە قوربانی هەبوونی سەرۆک وەزیرانێکی بەهێز لە بەغدا و بەغدایەکی ناوەندی تەنها بۆ ئەوەی شیعە بۆ خۆی رابکێشێ بەڵا نە توانی بەغدا بکاتەوە پایتەخت و نە عێڕاق وڵات و نە شیعە دۆست، بەڵکو هەرسێکیانی و هەموو عێڕاقیشی دۆڕاند، ئێستا لە هەموو عێڕاق هەولێر وەک دۆست ماوەتەوە کە ئەویش لە ژێر هەڕەشەی رۆکێت و دڕۆنەکانی میلیشیاکانی حەشدی شەعبی سەر بە ئێران دایە.

دواین نامەی یٔـێـران بۆ عـێـراق و کـوردستان

ئاسۆ حاجی

ڕیکلام