كێشەی گەورەی بەردەم كابینەی هەشتەمی حكوومەتی هەرێمی كوردستان لە چوار ساڵی رابردوودا ناسەقامگیری بوو، ناسەقامگیری بە مانا فراوانەكەی، ئەمەش كاریگەری قووڵی لەسەر كۆی ئەجێندا و كارنامەی حكوومەتەكە بەجێهێشت، بەجۆرێك حكوومەت لە بری ئەوەی سەرقاڵی كاروباری هاووڵاتییان بێت، ناچار دەبوو سەرقاڵی حزبەكان بێت، ناسەقامگیری دەردێكی كوشندەیە، لە هەر وڵاتێكدا سەرهەڵبدات، كۆی كایەكانی دەوڵەت و پرۆژەكانی حكوومەت بە هۆیەوە زیانمەند دەبن، لە كابینەی هەشتەمیشدا ئەو پەتای ناسەقامگیرییە باڵی بەسەر كۆی سێكتەرەكانی هەرێمی كوردستاندا كێشا و سەرئەنجام وایكرد هاووڵاتییان جۆرێك نائومێدیان بۆ دروست بێت و بە دوای گوتاری فریودەری سیاسی بكەون، ئەو گوتارانەی سەرجەمیان لە دژی حكوومەت بوون و موژدەی خۆشگوزەرانییەكی ساختەیان بە هاووڵاتی كورد دەدا، بەڵام تەمەنی ئەو گوتارە درۆینەیەی ئۆپۆزسیۆن بۆ هاووڵاتییان دەركەوت كە بەڕاستی ئەو مۆدێلەی ئۆپۆزسیۆن پشكی شێریان بەردەكەوێت لە هۆكاری سەرهەڵدانی ناسەقامگیری لە كوردستان.
بەگشتی تا ئێستا چەمكی ناسەقامگیری، یان سەقامگیری زیاتر لە كایەی ئەمنیدا چڕكراوەتەوە، راستە هەرێمی كوردستان لە رووی ئەمنییەوە تا ڕادەیەك سەقامگیرە، ئەگەرچی هەمیشە لەبەردەم هەڕەشەی فیكری توندڕۆیی دایە، ئەمەش لای دەزگە ئەمنییەكان بە هەند وەرگیراوە، سەرباری ئەوە بەڵام لە بوارەكانی دیكەدا كوردستان سەقامگیری تەواوی نەبووە، بەتایبەتی لە بواری سیاسی، زۆرترین فەوزای سیاسی تێدا بووە، ئەم فەوزایەش كاریگەری قووڵ و جەرگبڕی لەسەر ئەدای حكوومەت بەجێهێشت، خراپترینیان بە هۆی ئەوە فەوزای سیاسییەوە، وەزیری چەند حزبێك لە لایەن حزبەكانیانەوە ناچاركران لە حكوومەتەكەی نێچیرڤان بارزانی بكشێنەوە، ئەگینا بە گوتەی خۆیان لە ناو حكوومەتدا هیچ كەس رێگریان نەبووە، لەوەی خزمەت بكەن، بۆ نموونە وەزارەتی پێشمەرگە لای گۆڕان بوو، بەڵام فەرماندە باڵاكانی پارتی، هەمیشە داوای چەك و فیشەكیان لە وەزیری پێشمەرگە كردووە لە كاتێكدا گۆڕانیش بووە، ئەمە لە لایەك، هەروەها لە سەرجەم وەزارەتەكانی دیكەش هەمان شت هەبووە، وەك بەڵگەیەك كە رێگری لە كەس نەكراوە، كاتێك بیەوێت دەسەڵاتەكانی خۆی جێبەجێبكات.
دەتوانین بڵێین ئەوەی وایكرد وەزیری حزبەكان لە حكوومەت بكشێنەوە، خراپی حكوومەت نەبوو، بەو جۆرەی حزە بایكۆتچییەكان بانگەشەیان بۆی دەكرد و هاووڵاتییان هاندەدا، راستییەكەی كشانەوەیان لە حكوومەت بۆ بەرژەوەندی خودی هاووڵاتییان نەبووە، بۆ بەرژەوەندی حزبی و كەسی باڵادەستی ناو حزبەكان بوو، ئەگینا ئەوان دەیانتوانی دەسەڵاتی وەزارەت جێبەجێبكەن، كاتێك دەكشێنەوە، خەتای خۆیانە و لەژێر گوشاری حزبەكانیان بووە.
بە هەموو پێوەرەكان كابینەی هەشتەم لە دۆخێكی ناسەقامگیریدا بوو، بەوپێیەی چەمكی سەقامگیری، چەمكێكی فراوانە و راستەوخۆ پەیوەندی بە سەرجەم سێكتەر و كایەكانی دیكەی كۆمەڵگەوە هەیە، ئەو كایانەش سەروكاریان لەگەڵ حكوومەتدا هەیە، هەر لە ئاسایش و سیاسەت و دۆخی كۆمەڵایەتی و ئابووری و تەنانەت شەڕیشدا. كاتێكیش ناسەقامگیری سیاسی دروست دەبێت، حزبەكان دۆخێك دەهێننەكایەوە قوتابخانەكان بایكۆتی خوێندن بكەن، هونەرمەند لە تۆڵەی سیاسی، بانگەشەی بەفیڕۆدانی كارەبا بكات، تا حكوومەت بڕووخێت!
خەڵكانێك پێیانخۆش بێت نیوەی خاكەكەی داگیربكرێت و حەشد بەسەر پێشمەرگەدا سەربكەوێت، داعش نزیكی هەولێر ببێتەوە و باڵەخانەی حكوومەت و پەرلەمان بگرێت، تەنیا بە هۆی ئەوەی خۆیان لە دەسەڵاتدا نین! دەی كاتێك فەوزای سیاسی سەرهەڵدەدات، ناسەقامگیری باڵ بەسەر كۆمەڵگەدا دەكێشێت، هاووڵاتی ئەو پارەیەی هەیەتی، لە پرۆژەكاندا خەرجی ناكات، بازاڕ جوڵەی نامێنێت و پارە تەواو دەگمەن دەبێت، رۆحی هاووڵاتی لە قەڵەقیدا دەبێت و ئەو قەڵەقییەش دووچاری كۆمەڵێك بڕیاردانی سەیری دەكات، ئەمەش كاریگەری بەسەر پێشكەوتنی وڵات دەبێت، بەگشتی ئەو ناسەقامگیرییە سیاسییە هەموو كایەكانی دیكە دەگرێتەوە و كەلێنی گەورەش دەخاتە نێوان حكوومەت و هاووڵاتییان كە دواجار بە زیانی هاووڵاتییان و حكوومەتیش دەكەوێتەوە، تەنیا لە بەرژەوەندی كەمینەیەكی ناو حزبی فەوزەویدا دەبێت، بەوەی پێیانوایە گەشەیان لە فەوزادا دەبێت، ئاخر كاتێك ناسەقامگیری سەرهەڵدات، پێش هەر دامەزراوەیەكی دیكەی سیاسی، خودی حكوومەت زیانی بەردەكەوێت و ناتوانێت وەك پێویست خزمەتی هاووڵاتییان بكات، بەوجۆرەی كە پێویستە خزمەت بكات.
دوای راگەیاندنی ئەنجامەكانی هەڵبژاردن، ئێستا بەرچاوی هەموو لایەك روون بووەتەوە كە ئەمجارەش پارتی سەرۆكایەتیی حكوومەت دەگرێتەوە دەست، بۆیە پێشبینی دەكرێت دیسانەوە هێزگەلی دۆڕاو لە هەڵبژاردن، بیانەوێت ناسەقامگیری سیاسی دروستبكەنەوە تا بۆ ئەوەی وەك پرۆژەیەكی سیاسی بیخەنە خزمەتی گوتاری سیاسی خۆیانەوە، بەوپێیەی دۆخی ناسەقامگیری بۆ حكوومەت، دەردێكی كوشندەیە، بەوەی ناتوانێت خزمەتی هاووڵاتیان بكات، كەوایە ئەوەی لەسەر پارتی و ئەو هێزانەی حكوومەت دروستدەكەن، پێویستە، رێگەگرتنە لە نیەتی دروستكردنی ناسەقامگیری سیاسی لە لایەن ئەو هێزانەی دۆڕاوی هەڵبژاردنن، بەو مانایەی ئەوەی دێتە ناو حكوومەت، پێویستە بەوپەڕی باوەڕ و و جورئەتەوە هاتبێت و ئەوەی لەسەر شانێتی جێبەجێی بكات، بۆ ئەمەش دەكرێ پێش پێكهێنانی حكوومەت واژۆ لەسەر بەڵێننامەیەك بكرێت، كە ئەوەی دێتە ناو حكوومەتەوە واز لە گوتاری فریودەری بهێنێت و بەڕاستی بەشداری حكوومەت بێت، تەنیا سەركەوتنەكان نەكاتە هی خۆی، بەپێچەوانەوە خۆی لە شكست و كەموكوڕییەكان بشارێتەوە.
دۆخی سەقامگیر بە مانا فراوانەكەی، حكوومەتێكی سەقامگیریشی لێدەكەوێتەوە، حكوومەتی سەقامگیریش، هەڵبەت ئەگەر ئەم دەستەواژەیە دروست بێت، ئەوا كۆمەڵگەیەكی پێشكەوتوو دروستدەكات، كۆمەڵگەیەك تاكەكانی هەست بە سەقامگیری سیاسی، ئەمنی، كۆمەڵایەتی، ئابووری بكەن، هەموو ئەوانەش دواتر كۆمەڵگەیەكی تەندروست بەرهەم دەهێنن و هۆكار دەبن لەگەڵ رەوتی شارستانێتی جیهانی بچێتە پێشەوە، لە بری فەوزای سیاسیش، دیموكراسی و رێزگرتن لە بۆچوون و هەڵبژاردەی ئەوی دیكە، بنیاتنانی كۆمەڵگەیەكی سەقامگیر دەهێنێتە كایەوە. بەگشتی حكوومەتێكی سەقامگیر، لە بەرژەوەندی هاووڵاتییانی هەرێمی كوردستاندایە و پێویستە چیتر هاووڵاتی و ئەو هێزانەی حكوومەت دروست دەكەن، رێگە نەدەن هێزگەلی سیاسی بۆ بەرژەوەندی سیاسی و كەسی، سەقامگیریی كوردستان بشێوێنن، بەڵكو ئەو هێزانەی دەچنە ناو حكوومەتەوە، دەبێ بەوپەڕی باوەڕ و خۆشەویستییان بۆ حكوومەت وای لێكردبن، بەشداری حكوومەت بكەن، بەمەش ئەو هێزانە لای هاووڵاتییان هەم خۆشەویست و هەمیش جێی متمانە دەبن، بەوپێیەی هاووڵاتی چیتر ناسەقامگیری ناوێت و پێویستی بە سەقامگیرییەكی فراوان هەیە، بۆ ئەوەی مافەكانی پارێزراو بن و بەبێ قەڵەقی بژین و ئایندەیان روون بێت.
