پارێزگاری هەولێر بڕیاری دا سبەی دووشەممە لە تەواوی قوتابخانە و ناوەندەكانی خوێندن و دامودەزگاكانی حكوومەت لە سنووری پارێزگای هەولێر دەوام ئاسایی بێت و پشوو نەبێت.
ئومێد خۆشناو پارێزگاری هەولێر بە (كوردستان تیڤی) راگەیاند: سبەی دووشەممە لە تەواوی قوتابخانە و ناوەندەكانی خوێندن و دامودەزگاكانی حكوومەت لە سنووری پارێزگای هەولێر دەوام ئاساییە و پشوو نییە.
راشیگەیاند: هیچ هۆكارێكی ئەوتۆ نییە كە سبەی دووشەممە پشوو رابگەیەنرێت.
ئەم لێدوانەی پارێزگاری هەولێر لە كاتێكدایە كە لە بەشێك لە شار و شارۆچكەكانی هەرێمی كوردستان بۆ سبەی دووشەممە پشوو راگەیەنراوە، بەهۆی زۆری بەفربارین و هاتنی سەرمایەكی بەتین و ناسەقامگیری كەشوهەوا.
لە شارۆچكەی چۆمان لە سنووری پارێزگای هەولێر، هەروەها شارەدێكانی بیارە و تەوێڵە و گوندەكانی دەوروبەری لە سنووری پارێزگای هەڵەبجە بەهۆی سەرما و بەفربارینەوە بۆ سبەی دووشەممە پشوو راگەیەنراوە.
هەروەها هەریەك لە پارێزگاكانی كەركووك، نەینەوا، سەڵاحەدین و بەغدا هەر بەهۆی سەرماوە سبەی دووشەممە پشوویان راگەیاندووە.
کۆمێنت (0)
تا ئێستا هیچ کۆمێنتێک نەکراوە.