جاك لویس داڤید Jacques-Louis David

لەو بەرهەمەدا بە پۆشاكێكی ئیمپراتۆریانە كە وەك پاكیزەی قشتالە دیارە

داڤید: خانمەكەم پێویستە بزانی هونەرمەندانیش شانازی بە كار و كەڕامەتی خۆیان دەكەن. عیزەتی نەفسیان هەیە، ئەگەر لە دەستی بدەن، هەموو شتێكیان لە دەستدەچێت.
جاك لویس داڤیدJacques-Louis David  لە فەرەنسا بەیەك لە بلیمەتەكانی نیگار دادەنرێت. بەهۆی گەڕان بە دوای كەلەپوری كلاسیكی گریكی و رۆمانی كۆن و داڕێژتنەوەیان بە شێوەی نوێ، توانی قوتابخانەی كلاسیكی نوێ دابمەزرێنی. بەو كارەشی شۆڕشی بەسەری رێڕەوی رۆكۆكۆ كرد. لە كاتی هەڵگیرسانی شۆڕشە مەزنەكەی فەرەنساش، زیاد لە هەموو نیگاركێشێكی دیكە، رۆڵی دیاری گێڕا و مكوڕانەش بانگەوازی بۆ چاكسازی سیاسی رادیكالی و راماڵینی دەسەڵاتی ستەمكار دەكرد.

ئینجا وەك ئەندامی كۆنگرەی نیشتیمانی واژوی لەسەر لەسێدارەدانی هەریەك لە لویسی شانزدەهەم و ماری ئەنتوانێتی ژنی كرد. لەبەر ئەوەی هاورێی رۆپسپێربوو، بۆیە دوای لە سێدارەدانی رۆپسپیر، داڤید خرا زیندان. دواتر بە فەرمانی لێبوردنی گشتی، ئازادكرا. دوای دوورخستنەوەی ناپیلۆن و گەڕانەوەی بنەماڵەی بۆربۆن بۆ سەر تەختی پاشایەتی، لەبەر ئەوەی ناوی كەوتبە ناو لیستی قەغەكراوان، بۆیە بەناچاری سەری خۆی هەڵگرت و ئاوارەی شاری برۆكسلی بەلژیكابوو و لەوێشدا مرد. 
داڤید كۆمەڵێك تابلۆ و پۆرترێتی كێشاوە كە لە بەرهەمە جیهانیەكان پۆلینكراون، لەوانە تابلۆكانی (سوێندخواردنی برایانی هۆراس Le Serment des Horaces) و (مردنی سوكرات La Mort de Socrate) و (جوپیتر و ئانتیۆپ Jupiter et Antiope) و (كیوپید و پسیشە Cupid et Psyché). هەروەها وەك نیگاركێشی تایبەتی ناپلیۆن بۆناپۆرتیش كۆمەڵێك تابلۆی بۆ ئەو كێشاوە، لەوانە (بۆناپۆرت لە تەنگەبەری سان برنار Bonaparte franchissant le Grand-Saint-Bernard) و (ناپلیۆن بە جلی ئیمپراتۆری de Napoléon en costume impérial) و (تاج لەسەردانانی ناپلیۆن Le Sacre de Napoléon) و (ناپلیۆن لە نوسینگەكەی Napoléon dans son cabinet de travail) ...
ساڵی 1800 پۆرترێتی (مەدام ریكامییە madame Récamier) ی كێشا. خاتو ئۆجین فرانسواز جۆلێیت ریكامییە 1777- 1849 ی ناسراو بە مەدام ریكامییە، ژنێكی جوان و ژیر بوو. لە  هاوسەرەكەی سامانی بۆ جێمابوو كە بۆ یاریكردن بە عەقڵ و هۆشی پیاوانی سیاسەتمەدار و هزرمەند و هونەرمەند و ئەدیب، لە تەك جوانیەكەی بەكاریدەهێنا. سالۆنێكی كردبۆوە كە مەكۆی كۆبوونەوەی كەسایەتییە ناودارەكانی ئەو رۆژگارەی پاریس بوو. ناپلیۆن بە چیایەكی سەركێش ناوی دەبرد، هەرچەندە دواتر لەبەر نانەوەی كێشە دژی شۆڕش، دووریخستەوە. زۆر هونەرمەند تابلۆ و پەیكەریان بۆ كێشاوە.

لەو بەرهەمەدا بە پۆشاكێكی ئیمپراتۆریانە كە وەك پاكیزەی قشتالە دیارە، لەسەر قەنەفەیەكی نایاب راكشاوە و سەری بۆ دواوە سووڕاندووە تاكو لە بینەر بڕوانێ. 
بەڵام بەر لە تەواوكردنی ئەو كارە داڤید چاوی بە پۆرترێتێكی دیكەی خاتونی ناوبراو كەوت كە (فرانسوا جیرار François Gérard) ی قوتابی خۆی كاری لەسەر دەكرد. ئەوسا داڤید كەل و پەلەكانی كۆكردەوە و لە كاغەزێك بۆی نووسی (خانمەكەم.. من دەزانم ئافرەتە جوانەكان زۆر سەرقاڵی جوانی و شەنگی خۆیانن، بەڵام پێویستە بزانی هونەرمەندانیش شانازی بە كار و كەڕامەتی خۆیان دەكەن. عیزەتی نەفسیان هەیە، ئەگەر لە دەستی بدەن، هەموو شتێكیان لە دەستدەچێت. بۆیە رێگەم پێبدە لەو ئاستەدا بوەستم). بەو جۆرە كارەكە زۆر وردەكاری مابوو و دەستیلێهەڵگرت، بەڵام لەگەڵ ئەوەشدا وەك بەرهەمێكی جیهانی سەنگی خۆی هەیە، تەنانەت لە هەموو ئەو كارانەش كە بۆ ریكامییە كێشراون، ناودارترە. 
من لای خۆمەوە ئەو هەڵوێستەی نیگاركێش بە لوتكەی كەسایەتیەكەی دەبینم. ئەوساتەیە كە مرۆڤ لەپێناو داكۆكیكردن لە خود، شەق لە پارە و بەرژەوەندی دەدات. هاوكات تڕۆكردنی ئەو كەسانەشە كە وەها دەزانن بەرامبەرەكەیان خزمەتكاریەتی.
• ئەو بابەتە كورتەیەكە لە وتارێكی درێژی یەك لە دەستنووسەكانم كە تایبەتە بە هونەری شێوەكاری و ئامادەیە بۆ چاپكردن.
ن / ئاكۆ عه‌بدوڵا

Peywendîdar

Nûtrîn Vîdyo

COVID-19
تووشبووان
18,200
گیان له‌ده‌ستدان
670
چاکبوونەوە
10,480
تووشبووان
156,995
گیان له‌ده‌ستدان
5,531
چاکبوونەوە
112,102
تووشبوون
20,381,909
گیان له‌ده‌ستدان
741,684
چاکبوونەوە
13,280,356