31. Mîhrîcana Govendên Kurdistanê li Ewropayê dest pê dike

ev festîval her sal tê organîzekirin

31. Mîhrîcana Govendên Kurdistanê ku weke çalakiya demdirêj a Kurdistaniyên li Ewropayê her sal tê lidarxistin, îsal wê cara 18-19'ê Gulanê li Hannoverê pêk were.

Mîhrîcana Govendên Kurdistanê wê îsal cara 31'ê pêk were û 18-19'ê Gulanê li bajarê Hannover ê Elmanyayê bê lidarxistin. Ji herêmên cuda yên Kurdistanê wê îsal 31 komên govendê tevlî mîhrîcanê bibin.

Mîhrîcan wê bi meşa bi sedan lîstikvanê govendê û hunermendan dest pê bike û piştî pêşbirka 2 rojan wê xelat li serketiyan bên belavkirin.

Mîhrîcan di destpêka salên 1980'î de li Ewropayê dest pê kiriye. Her wiha kevntirîn Mîhrîcana Çand û Hunerê ya Kurdan e ku ji aliyê HUNERKOM'ê ve tê organîzekirin. Bi awayekî fermî sala 1986'an li bajarê Frankfurt ê Elmanyayê dest pê kir. Ji hingî ve bi rengekî kevneşop her sal tê lidarxistin.

Amedekariyên mîhrîcanê qediyane û meclîs û komîsyon ji bo wê xebatên xwe didomînin.

Armanca Mîhrîcanê parastina çanda Kurdan e

Armanca ji van mîhrîcanên Kurdî li qada derveyî welat û bi taybet jî li Ewropayê parsatina çanda Kurdan e. Ji bo vê jî wê her herêmek bi kincên xwe yên gelêrî, bi govend û amûrên xwe li nava bajêr bimeşin.

Hunermendên mêhvan wê di roja yekemîn de derkevin ser dikê û wê roja duyemîn jî komên govendê hunerên xwe pêşkêş bikin.

Komên govendê yên Kurdistanê li seranserê welatên Ewropayê hene. Nêzî 3 hezar, 3 hezar û pênc sed kes di nava komên govendê de cih digirin. Her wiha wê jûrî di çend beşan de komên tevlî mîhrîcanê bûne xelat bike.