چه‌ند تايبه‌تمه‌ندييێن شۆڕه‌شا مه‌زنا ملله‌تێ كورد (شۆڕه‌شا ئيلونێ)

يه‌كه‌م شۆڕه‌شه‌ ل كوردستانێ،‌ سنورێ يه‌ك ده‌ڤه‌رێ ده‌رباز بكه‌ت ( پێشمه‌رگه‌يێن شۆڕه‌شێ‌ ژ زاخو تا خانه‌قين)
Thumbnail

يه‌كه‌م شۆڕه‌شه‌ ل كوردستانێ،‌ سنورێ يه‌ك ده‌ڤه‌رێ ده‌رباز بكه‌ت ( پێشمه‌رگه‌يێن شۆڕه‌شێ‌ ژ زاخو تا خانه‌قين)

  • يه‌كه‌م شوڕه‌شه،‌ كوردێن سورا و بادينى، وه‌كو يه‌ك نه‌ته‌وه‌، ب هه‌ڤرا  بينت خزمه‌تێ بۆ دوزا ملله‌تێ كورد.
  • يه‌كه‌م شوڕه‌شه‌، كو ته‌ڤايا ئاين و نه‌ته‌وێن ل كوردستانێ دژين، به‌شدار بن و وه‌كو يه‌ك هه‌ڤسان د ماف و ئه‌ركاندا.
  • يه‌كه‌م شوڕه‌شه‌، سنورێن ده‌ستكرده‌ دناڤبه‌را پارچێن كوردستانێدا داببه‌زينيت: هاريكارى و پشته‌ڤانى و پێشمه‌رگه‌ بۆ شۆڕه‌شێ ژ هه‌رچار پارچێن وه‌لات.
  • ئه‌ڤ شۆڕه‌ش بوو چرايه‌ك نه‌ته‌وه‌يى ژ ته‌ڤايا ملله‌تێ كوردڕا، ل كوردستانێ و ل جيهانێ.
  • سه‌ركه‌فتنێن به‌رده‌وامێن له‌شكه‌رى، يێن ڤێ شوڕه‌شێ، لسه‌ر له‌شكه‌رێ حكومه‌تان، باوه‌ريا كوردان ب خوه‌‌ په‌يدا و موكوم كر.
  • ڤێ شۆڕه‌شێ هێز دا كورد و كوردستانييان بێژن: زۆرداريێ و هه‌ڤوه‌لاتييا ده‌ره‌جا دوو قه‌بوول ناكه‌ين.
  • ئه‌ڤ شوڕه‌ش جياوازه‌ ژ شوڕه‌شێن به‌رى خوه‌، كو پارته‌ك سياسى (پارتى ديموكراتى كوردستان) دگه‌ل سه‌ركردێ شوڕه‌شێ (بارزانيێ نه‌مر) رێبه‌رييا شۆڕه‌شێ دكر.
  • ل ناڤ ڤێ شۆڕه‌شێ، بۆ يه‌كه‌م جار،  سازيێن بلند هاتن دامه‌زراندن، كو بريارا چاره‌نڤيس د ده‌ست سازياندا بيت، نه‌ك تاكه‌ كه‌سان، يان ژى تاكه‌ حزب.
  • كونگرێ كوێ/كوێسنجه‌ق ل ئادارا 1963 (وه‌كو جڤاتا نوينه‌رێن گه‌ل)، جڤاتا سه‌ركردايه‌تييا شوڕه‌شێ ل 7/10/1966 (وه‌كو په‌رله‌مانه‌ك، ئه‌ندام ژ هه‌موو پێكهاتێن كوردستانێ)، مه‌كته‌ب ته‌نفيزى/نڤيشسينگه‌ها جێبه‌جێكار (وه‌كو حوكومه‌ته‌كا بچۆك ژ 11 وه‌زيران). سازيێن بلندێن شۆڕه‌شا مه‌زنا ملله‌تێ كورد بوون.
  • شۆڕه‌شا ئيلونێ يه‌كه‌م شۆڕه‌شه‌ خودان ده‌ستوره‌ك نڤيسى، وه‌كو بلندترين ياسا (ده‌ستورێ جڤاتا سه‌ركردايه‌تييا شۆڕه‌شێ ل 23/9/1968، پێك دهات ژ ديباجه‌ و 26 مادێن ده‌ستورى).
  • شۆڕه‌شا مه‌زنا ملله‌تێ كورد يه‌كه‌م شۆڕه‌شا كوردستانييه‌‌، خودى سازيێن تايبه‌ت هه‌بوون بۆ ڕێڤه‌برنا كاروبارێن ڕۆژانه‌ يێن هه‌ڤوه‌لاتييان.
  • يه‌كه‌م شۆڕه‌شه‌، سه‌ره‌رايى كاودانێن دژوار و شه‌ڕێن گران، سازييا خوه‌ يا په‌روه‌ردێ هه‌بيت. قوتابخانه‌ و فێربوون هه‌بوو دناڤ شوڕه‌شێدا، زانكۆ هه‌بوو.
  • يه‌كه‌م شۆڕه‌شه‌، سازييه‌ك سه‌ربخوه‌ هه‌بيت بۆ دادوه‌ريێ و دادوه‌رێن سه‌ربخوه هه‌بن‌. (مادا 15 ژ ده‌ستورێ جڤاتا سه‌ركردايه‌تيێ: "دادوه‌رى ل كوردستانێ ب ته‌مامى سه‌ربخوه‌يه‌ د هه‌موو چالاكيێن خوه‌دا")
  • يه‌كه‌م شۆڕه‌شه‌ ل كوردستانێ‌ له‌شكه‌ره‌ك ڕێكخستى هه‌بيت (فه‌رماندێ گشتى، سه‌رۆك ئه‌ركان، سێ له‌شكه‌ر و هه‌ر له‌شكه‌ره‌كى سێ ليوا).
  • شاگردێن ڤێ شوڕه‌شێنه‌ تا ئه‌ڤڕۆ سه‌روكاتيا له‌شكه‌ر و پارتێن سياسى و ده‌زگاهين راگه‌هاندنێ دكه‌ن.
  • ڤێ شوڕه‌شێ هه‌ستا هه‌ڤوه‌لاتيبوون و نيشتمانپه‌روه‌رييا كوردستانى چه‌سپاند،  ل شوينا په‌يوه‌نديێن ديتر يێن جڤاكى. (كوڕێ عه‌شيرێ پێشمه‌رگه،‌ سه‌ره‌رايى كو سه‌رۆك عه‌شيرێ وى ل ئاليێ حكومه‌تێ)‌.
  • ڤێ شۆڕه‌شێ يه‌ك روژێ پينگاڤه‌ك به‌ره‌ف ته‌رورێ و كوشتنا سڤيلان نه‌هاڤێت.
  • ڤێ شۆڕه‌شێ‌ باوه‌رى ب دانوستاندنێ هه‌بوو، وه‌كو پرنسيپ بۆ بده‌ستڤه‌ئينانا مافێن ملله‌تێ كورد.
  • ئه‌ڤ شۆڕش ته‌نها شۆڕه‌شا كوردستانێيه‌، كو حكومه‌تێن داگيركه‌ر  نه‌چار بكه‌ت، شاندێن حكومى لسه‌ر ئاستێن بلند بشينيت كوردستانێ، بۆ دانوستاندنا دگه‌ل سه‌ركردايه‌تييا شۆڕه‌شێ. (1961، 1963، 1964، 1968، 1969- 1970).
  • ئه‌ڤ شوڕه‌ش يه‌كه‌م شوڕه‌شا كوردستانييه‌‌، كو ئارمانجا خوه‌ يا ده‌ستنيشانكرى بجى بينت و دانپێدانا ب مافێ ئۆتونۆمى ل پارچه‌يه‌كا وه‌لات، بده‌ستڤه‌ بينيت.
  • ڤێ شوڕه‌شێ ئارمانجا خوه‌ بجى ئينا و عيراق ژ ده‌وله‌ته‌ك سێنترال (مه‌ركه‌زى) كر ده‌وله‌ته‌ك ديتسێنترال (نه‌ناوه‌ندى).

 

هزار سلاڤ ل گيانێ پاكێ بارزانيێ نه‌مر، سه‌رۆكێ شۆڕه‌شا مه‌زنا كوردا، هزار سلاڤ ل گيانێ پاكێ شه‌هيد و پێشمه‌رگه‌يێن ڤێ شۆڕه‌شێ و سه‌روه‌رى و سه‌رفرازى بۆ ملله‌تێ كورد و كوردستانيان.

 

(*ئه‌كاديمى د ڕۆژهه‌لاتناسى و زانستێن سياسيدا)

بابه‌ته‌ پەیوەندیداره‌كان

نوێترین ڤیدیۆ