بڕیارە ئەمساڵ ژمارەیەك پێشانگای نێودەوڵەتی لە شاری ھەولێر بكرێنەوە، سەرپەرشتیاری پێشانگا نێودەوڵەتییەكانیش دەڵێ، یەكەم پێشانگای ئەمساڵ لە رۆژانی داھاتوودا بەڕێوە دەچێت، كە ماڵی نموونەییە و بەروارد بە ساڵی رابردووش كردنەوەی پێشانگا نێودەوڵەتییەكان زۆر زیاتر دەبێت.
عەبدوڵڵا عەبدولڕەحیم سەرپەرشتیاری پێشانگای نێودەوڵەتیی ھەولێر، ئەمساڵی بە ساڵی كردنەوەی پێشانگای نێودەوڵەتی ناو برد و دەڵێت: ساڵی رابردوو تەنیا چوار پێشانگای نێودەوڵەتی لە ھەولێر كراونەتەوە، بەڵام بڕیارە ئەمساڵ ده پێشانگای نێودەوڵەتی بكرێنەوە و یەكەم پێشانگاش لەم مانگەدا دەبێت .
گوتیشی : قەیرانی دارایی و شەڕی داعش كاریگەرییەكی نەرێنییان كردبووە سەر رەوشی پێشانگا نێودەوڵەتییەكان و بە درێژایی ساڵانی شەڕی بەرەنگاربوونەوەی داعش و قەیرانی دارایی، ھیچ وڵات و كۆمپانیایەك ئامادە نەبوو بەشداری لە پێشانگادا بكات.
لە ساڵانی رابردوو نزیكەی حه‌فتا پێشانگای نێودەوڵەتی لە شاری ھەولێر بەڕێوە چوونە سەدان كۆمپانیا بەشدارییان تێدا كردوون، كردنەوەی پێشانگاكان كارئاسانی بۆ بازرگانان و كۆمپانیا نێوخۆیی و بیانییەكان كردووە بۆ ئیمزاكردنی گرێبەست و كردنەوەی لقی دەیان كۆمپانیای براندی جیھانی لە ھەرێمی كوردستان.
کۆمێنت (0)
تا ئێستا هیچ کۆمێنتێک نەکراوە.