دەستەی دەسپاكی: وردبینی دەسپاكی كاندیدەكانی هەڵبژاردنی پەرلەمانی كوردستان كۆتایی هات

دەستەی دەسپاكی هەرێمی كوردستان ئاشكرای كرد كە كۆتاییان بە وردبینی دەسپاكی كاندیدەكانی هەڵبژاردنی پەرلەمانی كوردستان هێناوە.

سەرخێل هاشم بەڕێوەبەری راگەیاندنی دەستەی دەسپاكی هەرێمی كوردستان رایگەیاند: لەسەر داوای كۆمسیۆنی باڵای هەڵبژاردنەكان لە عێراق، دەستەی دەسپاكی لە ڕێكەوتی 6/8/2024، دوای ئەوەی بەشی دووەمی ناوی كاندیدانی بۆ هەڵبژاردنی پەرلەمانی كوردستان بە دەست گەیشت، لەسەر بنەمای مەرجەكانی خۆپاڵاوتن وردبینی بۆ ناوەكان كرا.

راشیگەیاند: مەرجی كۆمیسیۆن ئەوەیە كە نابێ‌ كاندیدانی هەڵبژاردنی پەرلەمانی كوردستان زیندانی كرابن واتا "حوكم" درابن لەسەر یەكێك لە تاوانەكانی گەندەڵی.

هەروەها راشیگەیاند: ئەمڕۆ دووشەممە رێكەوتی 12/8/2024 دەستەی دەسپاكی لیستی وردبینی لە لیستی دووەمی ناوەكان تەواو كردووە و بە نووسراوی فەرمی رەوانەی كۆمیسیۆنی هەڵبژاردنی عێراقی كردووەتەوە.

سەرخێل هاشم بەڕێوەبەری راگەیاندنی دەستەی دەسپاكی جەختیشی كردەوە كە ئێستا وردبینی دەسپاكی لە كۆی ژمارەی كاندیدەكانی هەڵبژاردن بە كۆتا هاتووە.

لە رێكەوتی 3ی ئاداری رابردوو، نێچیرڤان بارزانی سەرۆکی هەرێمی کوردستان لە مەرسومێکدا وادەی هەڵبژاردنی خولی شەشەمی پەرلەمانی کوردستان دیاری کرد کە ڕۆژی 10ـی حوزەیرانی 2024 بەڕێوەدەچێت.