قوتابخانەیەكی حكوومی خوێندنی ئینگلیزی لە هەولێر دەكرێتەوە.. هەموو منداڵێك وەردەگیرێت

بەڕێوەبەرایەتی گشتی پەروەردەی هەولێر رایگەیاند، قوتابخانەیەكی حكوومی خوێندنی ئینگلیزی لە هەولێر دەكرێتەوە و تێیدا قوتابیان لە باخچەی ساوایان تا پۆلی 12ی ئامادەیی وەردەگرێت، بەڵام بە مەرج.

بەڕێوەبەرایەتییەكە لە ئاگادارییەكدا رایگەیاند: کۆمەڵگەیەکی پەروەردەیی حکوومی بە سیستمی وەزارەتی پەروەردە (خوێندنی ئینگلیزی) دەکەینەوە، لە قۆناخی یەکەمی باخچەی منداڵان تا پۆلی 12ی ئامادەیی زانستی.

راشیگیاند: هەر قوتابییەک یاخود بەخێوکارێکی قوتابییان دەتوانن فۆڕمی پێشکەشکردن بۆ ئەو کۆمەڵگەیە وەربگرن بەگوێرەی ئەم مەرج و پێوەرانەی خوارەوە.

یەکەم/ باخچەی منداڵان :پێکدێت لە دوو قۆناخ ( kg2,kg1 ).

-  بۆ kg1 بۆ ساڵی خوێندنی 2024-2025 تەنها (50) منداڵ وەردەگیرێت، ئەمیش لەڕێگەی پڕکردنەوەی فۆڕمی داواکاری و وەرگرتن بە تیروپشک دەبێت.

- بۆ kg2 بۆ ساڵی خوێندنی 2024 – 2025 تەنها (50) منداڵ وەردەگیرێت، ئەمیش لەڕێگەی پڕکردنەوەی فۆڕمی مەرجدار، تەواوکردنی پۆلی kg1 لە ساڵی پێشووتر و ئەنجامدانی تیروپشک.

* منداڵانی باخچەی حکوومی و ناحکوومی مافی پڕکردنەوەی فۆڕمیان هەیە.

دووەم / قوتابیانی وەرگیراو لە پۆلی 1ی بنەڕەتی تا 6ی بنەڕەتی .

-  بۆ پۆلی 1ی بنەڕەتی ساڵی خوێندنی 2024 – 2025 تەنها ( 75 ) قوتابی وەردەگیرێت ئەویش لە ڕێگەی پڕکردنەوەی فۆڕم و پاشان هەڵسەنگاندنی IQ تێست ئەنجامدەدرێت، مەرجە قوتابی قۆناخی باخچەی منداڵانی تەواوکردبێت.

-  بۆ پۆلی 2 و 3 و 4 و 5 و 6ی بنەڕەتی بۆ ساڵی خوێندنی 2024 – 2025 بۆ هەر پۆلێک ( 75 ) قوتابی وەردەگیرێت، ئەمیش لەڕێگەی پڕکردنەوەی فۆڕمی مەرجدار بەم شێوەیەی خوارەوە :

* بۆ قوتابییانی قوتابخانەی حکوومی و ناحکوومی لۆکاڵ پێویستە تێکڕای نمرەکانی بۆ ساڵی خوێندنی 2023 – 2024 کەمتر نەبێت لە 90٪ .

* بۆ قوتابیانی قوتابخانەی نێودەوڵەتی سابیس و قوتابخانە نێودەوڵەتیەکانی دیکە پێویستە تێکڕای نمرەکانی بۆ ساڵی خوێندنی 2023 – 2024 کەمتر نەبێت لە 85٪ .

تێبینی / هەڵسەنگاندێک بۆ ئاستی زمانی ( ئینگلیزی ) ئەنجام دەدرێت .

سێیەم / وەرگرتن بۆ پۆلەکانی 7 و 8 و 9ی بنەڕەتی بۆ ساڵی خوێندنی 2024 – 2025 تەنها (120) قوتابی بۆ هەر پۆلێک وەردەگیرێت .

* بۆ قوتابییانی قوتابخانەی حکوومی و ناحکوومی لۆکاڵ پێویستە تێکڕای نمرەکانی بۆ ساڵی خوێندنی 2023 – 2024 کەمتر نەبێت لە 90٪ .

* بۆ قوتابییانی قوتابخانەی نێودەوڵەتی سابیس و قوتابخانە نێودەوڵەتییەکانی دیکە، پێویستە تێکڕای نمرەکانی بۆ ساڵی خوێندنی 2023 – 2024 کەمتر نەبێت لە 85٪ .

پاش وردبینیکردنی فۆڕمەکانی پێشکەشکردن، ڕۆژێک دیاری دەکرێت کە بۆ هەڵسەنگاندنێکی زانستی بە زمانی ئینگلیزی (بیرکاری و زانست و ئینگلیزی) ئەنجامدەدرێت، قوتابی پێشکەشکار لەیەک ڕۆژ و لەیەک کاتدا وەڵامی پرسیارەکان دەداتەوە وەک هەڵسەنگاندنی نیشتمانی پە پەڕەی سۆما دەبێت .

چوارەم / پێشکەشکردن بۆ پۆلەکانی 10 و 11 و 12ی ئامادەیی زانستی :

- بۆ پۆلی 10ی ئامادەیی تەنها ( 120 ) قوتابی وەردەگیرێت .

- بۆ پۆلی 11ی ئامادەیی تەنها ( 120 ) قوتابی وەردەگیرێت .

- بۆ پۆلی 12ی ئامادەیی تەنها ( 125 ) قوتابی وەردەگیرێت .

لەڕێگەی پڕکردنەوەی فۆڕمی مەرجدار دەبێت بەم شێوەیەی خوارەوە:

* بۆ قوتابییانی قوتابخانەی حکوومی و ناحکوومی لۆکاڵ پێویستە تێکڕای نمرەکانی بۆ ساڵی خوێندنی 2023 – 2024 کەمتر نەبێت لە 90٪ .

* بۆ قوتابییانی قوتابخانەی نێودەوڵەتی سابیس و قوتابخانە نێودەوڵەتیەکانی دیکە، پێویستە تێکڕای نمرەکانی بۆ ساڵی خوێندنی 2023 – 2024 کەمتر نەبێت لە 85٪ .

تێبینی / بۆ پۆلی 12ی ئامادەیی تەنها ئەو قوتابییانەی دەرچووی پۆلی 11ی ئامادەیین کە دەرچووی ساڵی خوێندنی 2023 – 2024 ن وەردەگیرێن.

پاش جیاکردنەوەی فۆڕمەکان هەڵسەنگاندنێک بە زمانی ئینگلیزی لە وانەکانی ( بیرکاری و کیمیا و فیزیا و بایلۆجی و ئینگلیزی ) ئەنجام دەدرێت، کە قوتابی لەیەک ڕۆژدا و لەیەک کاتدا هاوشێوەی تاقیکردنەوەی نیشتیمانی بە پەڕەی سۆما ئەنجام دەدرێت .

تێبینی / بەرواری پێشکەشکردن لە ڕۆژی سێشەممە 13/8 دەست پێ دەکات، وە پێویستە فۆڕمەکان لە ڕۆژی سێشەممە 20/8 بگەڕێندرێنەوە بۆ ئەو ناوەندانەی فۆڕمیان لێ وەرگرتووە.

*فۆڕم وەرگرتن لە کاتژمێر 9ی بەیانی تا کاتژمێر 1ی پاشنیوەڕۆ دەبێت .

*قوتابخانەی مامۆستا سەمیر - ئەنالیندی کۆن / 100 مەتری / نزیک نەخۆشخانەی فریاکەوتنی ڕۆژئاوا.