به هاوین و له جه‌نگه‌ی گه‌رمادا، بارانبارینی به‌خوڕ و لافاو ئه‌فغانستانی گرتووه‌ته‌وه و به‌هۆیه‌وه لانیكه‌م سیی و پێنج كه‌س گیانیانله‌ده‌ستداوه.
گوته‌بێژی پارێزگاری نه‌نگه‌رهار رایگه‌یاند، به‌هۆی بارانبارینی به‌خوڕ له شاری جه‌لالئاوا و چه‌ند ناوچه‌یه‌كی دیكه، 35 كه‌س گیانیانله‌ده‌ستداوه كه 5 كه‌سیان ئه‌ندامی یه‌ك خێزانن. ئاماژه‌ی به‌وه‌ش كرد، به‌هۆی فاو دووسه‌د و په‌نجا كه‌س برینداربوونه.
به گوته‌ی شایه‌تحاڵان ئافره‌تان و منداڵان به‌شێكی سه‌ره‌كی قوربانیانی لافاوه‌كه‌ن. لای خۆشییه‌وه زه‌بیحوڵڵا موجهید گوته‌بێژی تاڵیبان له تۆڕی كۆمه‌ڵایه‌تی ئێكس رایگه‌یاند، به‌رپرسانی ناوچه‌كه راسپێردراون كه به‌خێرایی هاریكاری لێقه‌وماوان بكه‌ن و شوێن و خواردن بۆ ئاواره‌كان و ئه‌و كه‌سانه‌ی ماڵوحاڵیان له‌ده‌ستداوه دابین بكه‌ن.
ئه‌فغانستانی دوای به ده‌سه‌ڵات گه‌یشتنی تاڵیبان یه‌كێك له هه‌ژارترین وڵاتانی جیهانه و سه‌دا هه‌شتای داهاتی خه‌ڵك له‌سه‌ر كشتوكاڵه، گۆڕانكارییه‌كانی كه‌شوهه‌واش وای كردووه له‌ماوه‌ی چه‌ند ساڵی رابردوودا زیانێكی زۆر به‌ر كه‌رتی كشتوكاڵ له ئه‌فغانستان بكه‌وێت.
کۆمێنت (0)
تا ئێستا هیچ کۆمێنتێک نەکراوە.