سەرۆک بارزانی لە کۆبوونەوەی لەگەڵ چین و توێژەکانی قەزای بەردەڕەش جەختی کردەوە کە سەركەوتن لە یەكبووندایە و كوردستان لەسەرووی پارتی و لەسەرووی هەموو بەرژەوەندییەكی دیکەیە.
سەرۆک مەسعود بارزانی پاشنیوەڕۆی ئەمڕۆ چوارشەممە 23ـی 08ـی 2023 سەردانی قەزای بەردەڕەشی كرد و لەگەڵ جەماوەر و چین و توێژەكانی ئەو دەڤەرە كۆبووەوە.
لە كۆبوونەوەكەدا سەرۆک بارزانی گوتارێكی پێشكەشی ئامادەبووان كرد و لە گوتەكەیدا تیشكی خستەسەر بارودۆخی ناوخۆی هەرێمی كوردستان و جەختی كردەوە كە سەركەوتن لە یەكبووندایە و لە هەوڵەكانی بۆ بەدیهاتنی یەكڕیزی لەسەر بابەتە نیشتیمانی و نەتەوەییەكان بەردەوام دەبێت. هەر پەیوەست بە بارودۆخی ناوخۆی هەرێمی کوردستان سەرۆك بارزانی ڕایگەیاند: نابێ لایەنەكان بكەونە سەر ڕێگەیەک كە بۆ دروستكردنی كێشە بۆ پارتی یاری بە بابەتە نەتەوەییەكان بكەن و كار بۆ لاوازكردنی هەرێم بكەن؛ چونكە كوردستان لەسەرووی پارتی و لەسەرووی هەموو بەرژەوەندییەكی دیکەیە. هەروەها ئەوەشی بۆ ئامادەبووان شی كردەوە كە هەڵبژاردن سەنگی مەحەكە بۆ حوكمڕانی و پێگەی لایەنەكان و دەبێ لەو ڕێگەیەوە لایەنەكان متمانەی گەل وەربگرن.
سەرۆک بارزانی ئاماژەی بە پەیوەندییەكانی نێوان هەرێمی كوردستان و حكوومەتی فیدراڵ دا و ئەوەی خستەڕوو كە حكوومەتی تازەی عێراق لەسەر بنەمای كۆمەڵێک ڕێككەوتن و پڕەنسیپەكانی شەراكەت و تەوازون و تەوافوق دامەزراوە، بەڵام بەداخەوە هێشتا نیەتی خراپی پشتگوێخستنی ڕێككەوتنەكان هەر ماوە. سەرۆک بارزانی جەختیشی كردەوە كە "پشتگیریی سەرۆكوەزیرانی عێراقی فیدراڵ سوودانی دەكەین بۆ ئەوەی بتوانێ ئەو ڕێككەوتنانە جێبەجێ بكات و ڕێگریی لێ نەكرێت."
هەر لەو كۆبوونەوەیەدا دەرگەی گفتوگۆ بۆ ئامادەبووان كرایەوە و سەرۆک بارزانی وەڵامی پرسیار و تێبینییەكانی ئامادەبووانی كۆبوونەوەكەی دایەوە و ئەوەشی خستەڕوو كە كابینەی نۆیەمی حكوومەتی هەرێمی كوردستان سەرباری بوونی گرفت و قەیران ئەوەی لە توانایدا بووە بۆ خزمەتكردنی خەڵک كردوویەتی و لە هەوڵی ئەوە دابووە سەرچاوەكانی دیکەی داهات بەتایبەتی لە بواری كشتوكاڵ و گەشتوگوزار بۆ هەرێمی كوردستان دابین بكات.
کۆمێنت (0)
تا ئێستا هیچ کۆمێنتێک نەکراوە.