پارتی دیموکراتی کوردستان لە پارێزگای کەرکووک، سەرۆک لیستی بۆ هەڵبژاردنی ئەنجوومەنی پارێزگا دیاری کردووە و حەسەن مەجید سەرۆکی لیستی پارتی دەبێت بۆ هەڵبژاردنی ئەنجوومەنی پارێزگاکە.
د. کەمال کەرکووکی بەرپرسی مەکتەبی ڕێکخستنی کەرکووک - گەرمیانی پارتی دیموکراتی کوردستان ڕایگەیاند: حەسەن مەجید کارگێری لقی سێ پارتی دەبێتە سەرۆک لیستی پارتی لە کەرکووک بۆ هەڵبژاردنی ئەنجوومەنی پارێزگا.
لە ڕوونکردنەوەیەکدا د. کەمال کەرکووکی ئاماژەی بە لێدوانێکی محەمەد کەمال بەرپرسی لقی 3ـی پارتی کردووە، کە لە یەکێک لە کەناڵە تەلەڤزیۆنییەکان لە وەڵامدانەوەی پرسیارێک ھەڵەیەکی زمانەوانی ڕووی داوە و ناوی سەرۆک بارزانی ھێناوە.
بەرپرسی مەکتەبی ڕێکخستنی کەرکووک - گەرمیانی پارتی ڕوونی کردۆتەوە کە لێدوانەکەی بەرپرسی لقی سێی پارتی ھەڵەیەکی زمانەوانی بووە، دروستەکەی ئەوەیە کە بەرپرسی لیستی پارتی لە پارێزگای کەرکووک (حەسەن مەجید ڕەشید)ـە و ڕێگەپێدراوی (مخول) لیستەکەمانیش، ھەڤاڵ سامان ڕەشیدە.
دەقی ڕوونکردنەوەکەی د. کەمال کەرکووکی بەرپرسی مەکتەبی ڕێکخستنی کەرکووک - گەرمیانی پارتی دیموکراتی کوردستان:-
ڕوونکردنەوەیەک لە مەکتەبی ڕێکخستنی پارێزگای کەرکووک - گەرمیانی پارتی دیموکراتی کوردستانەوە
ڕێککەوتی 13ـی 08ـی 2023، لە لێدوانێکی بەرپرسی لقی 3ـی پارتیمان ھەڤاڵ (محەمەد کەمال) لەگەڵ کەناڵی ڕووداو، لە وەڵامدانەوەکەی، ھەڵەیەکی زمانەوانی ڕووی داوە، ناوی ڕێزدار جەنابی سەرۆکی ھێناوە.
بۆ هەموولایەکی ڕووندەکەینەوە، لێدوانەکەی بەرپرسی لقی سێی پارتیمان ھەڵەیەکی زمانەوانی بووە، دروستەکەی ئەوەیە کە بەرپرسی لیستی پارتیمان لە پارێزگای کەرکووک ھەڤاڵ (حسن مجید ڕەشیدە) و ڕێگەپێدراوی (مخول) لیستەکەمانیش، ھەڤاڵ سامان ڕەشیدە.
لەگەڵ ڕێزماندا..
د.کەمال کەرکووکی
بەرپرسی مەکتەبی ڕێکخستنی پارێزگای کەرکووک-گەرمیان
کۆمێنت (0)
تا ئێستا هیچ کۆمێنتێک نەکراوە.