سەرۆکی ئەرکانی وەزارەتی پێشمەرگەی هەرێمی کوردستان ئەمڕۆ چوارشەممە 06ـی 07ـی 2022 پێشوازی لە بەرپرسی تیمی ئاسایشی سوپای ئەمریکا کرد و ڕایگەیاند، هێزەکانی پێشمەرگە لە ڕێگەی ڕاهێنانی بەردەوامەوە ئاست و توانا سەربازییەکانیان بەرز دەکرێتەوە.
وەزارەتی پێشمەرگە ڕایگەیاند: فەریق ڕوکن عیسا عوزێر سەرۆکی ئەرکانی وەزارەتی پێشمەرگە، بە ئامادەبوونی بەڕێوەبەری پەیوەندییەکان و هەماهەنگی وەزارەت، پێشوازی لە کۆڵۆنێڵ سان بۆرن بەرپرسی تیمی ئاسایشی ئەمریکا لە هەرێمی کوردستان و شاندی یاوەری کرد.
ڕاشیگەیاند: لە کۆبوونەوەکە کۆڵۆنێڵ سان بۆرن پیرۆزبایی دەستبەکاربوونی لە سەرۆکی ئەرکان کرد، هیوای سەرکەوتنی بۆ خواست و ئامادەیی خۆشی بۆ هەموو هاوکاری و هەماهەنگییەکی پێویست دەربڕی.
ئەوەشی خستەڕوو کە هەر لە کۆبوونەوەکە کۆڵۆنێڵ سان بۆڕن کورتەیەکی لەبارەی سەنتەری ئۆپەراسیۆنی هاوبەش و چۆنییەتی کاروبار و ئەرکەکانی ئەو سەنتەرە پێشکەش کرد.
هەروەها ڕایگەیاند: بەرپرسی تیمی ئاسایشی ئەمریکا بە بایەخەوە باسی لە پڕۆژەکانی چاکسازی وەزارەتی پێشمەرگە کرد و گوتی کە ئەوان بەردەوام هاوکاری ئەو پڕۆژانە دەکەن و لە بواری راوێژکاریشدا ئەزموونی پیشەییانەی خۆیان لەم بوارەدا دەگەیەنن.
وەزارەتەکە ئاماژەی بەوەش داوە کە باسیان لە چۆنیەتی گەیاندن و دابەشکردنی هاوکارییە سەربازییەکان کرد، لە بوارەکانی مەشق و لۆجستییەوە، سەرۆکی ئەرکان دووپاتی کردەوە کە هێزەکانی پێشمەرگە، لە ڕێگەی مەشق و ڕاهێنانە بەردەوامەکانەوە، ئاست و توانا سەربازییەکانیان بەرز دەکرێتەوە و بۆ ئەم مەبەستەش سەرۆکایەتی ئەرکان لەسەر بنەمای تیۆرە سەربازییە مەشقییە نوێیەکان، نەخشەڕێگەی نوێ دادەڕێژێت بە هاوکاری شارەزایانی بواری مەشقیی هێزەکانی هاوپەیمانان.
کۆمێنت (0)
تا ئێستا هیچ کۆمێنتێک نەکراوە.