هەژاری عێراقییەكان ناچار دەكات پەنا بۆ خۆكوشتن ببەن

بەپێی ئامارەكانی حكوومەتی عێراقی لە ساڵی 2022 ڕێژەی هەژاری گەیشتووەتە 25% ، هاوكات وەزارەتی كاری عێراقی رایگەیاندووە كە 4 ملیۆن بێكار لە عێراقدا هەن و ڕێژەی بێكاری گەیشتووەتە 13.8%. ئەمەش لە حاڵێكدایە  كە داهاتی عێراق لەدوای 2003ەوە لە فرۆشتنی نەوت زیاتر لە یەك تریلیۆن دۆلار بووە و ئێستا ئەو داهاتە مانگانە زیاتر لە 10 ملیار دۆلارە.
بەپێی توێژینەوەكان ڕێژەی ئومێد بە ژیان لە عێراقدا ڕۆژ لەدوای ڕۆژ لە دابەزیندایە و هۆكارەكانیشی دەگەڕێتەوە بۆ: پاشماوەی سیاساتی بەعس، سیاسەتی هەڵەی حكوومەتەكانی دوای 2003، دەستوەردانی دەرەكی، تیرۆر، نەمانی چینی ڕۆشنبیر لە عێراق، بێكاری، هەژاری، تایفەگەری، حوكمی میلیشیاكان، لاوازیی ئازادییە تاكەكەسیەكان، پاشەكشەی ئازادیی فكری و سیاسی و ئابووری، مۆنۆپۆلیزمی ئابووری، لاوازیی فەردانییەت و بەهێزی دابونەریت، گەشەكردنی بەدەوییەت.ئەمەش عێراقییەكانی ناچار كردووە پەنا بۆ خۆكوشتن ببەن.
لە هەفتەكانی رابردوودا كەسێك لە بابل لەبەر هەژاری، هاوسەرەكەی و دوو منداڵەكەی فڕێدایە ناو ڕووباری فورات و دواتریش خۆی هەڵدایە ناو ڕووبارەكە. بەڵام دواتر لەلایەن مەفرەزەكانی بەشی پۆلیسی ناحیەی موسەیب و بە هاوكاری لەگەڵ كۆمەڵێك كەس توانرا ژن و مێردەكەو مندڵێكیان رزگار بكرێن و گەڕان بەدوای تەرمی منداڵەكەی تریش بەردەوامە.
هەروەها لە دوو رۆژی رابردوودا لەشاری بەغدا كەسێك بەناوی عومەر عەمار كە بەیاسر ناسرابوو، لەبەر هەژاری ئاگری لەخۆی و دوو لەمنداڵەكانی بەرداو بەهۆیەوە هەرسێكیان گیانیان لەدەستدا، بەگوێرەی زانیارییەكان یاسر لەبەر هەژاری پێشتریش هەواڵی خۆكۆشتنی دابوو.