وەزارەتی پێشمەرگە: له‌ ئۆپه‌راسیۆنه‌كه‌ی ئه‌مڕۆدا توانراوه‌ 14 شوێن و پەناگەی داعش لەناو ببرێن

ئۆپەراسیۆنی هاوبەشی نێوان هێزەکانی پێشمەرگە و سوپای عێراقی لە گەرمەسێر بەردەوامی هەیە.

وەزارەتی پێشمەرگە بڵاویكردۆته‌وه‌ كه‌  ئۆپەراسیۆنی هاوبەشی هێزەکانی پێشمەرگە لەگەڵ سوپای عێراقی لە هەردوو میحوەری یەکی گەرمەسێر و دووی قەرەتەپە بەردەوامی هەیە.

وەزارەتی پێشمەرگە ده‌شڵێت:پێشمەرگە وسوپای عێراق توانیویانە بەشێکی زۆری ناوچەکە کێوماڵ بکەن، لە هەندێ خاڵدا نزیکبوونەتەوە لە یەکتری و هاوکاری وهەماهەنگی لە نێوانیان هەیە، ئۆپەراسیۆنەکە سەرکەوتووانە بەڕێوەدەچێت، توانراوە (14) شوێن و پەناگەی داعش لەناو ببرێن.

هه‌روه‌ها وەزارەتی پێشمەرگە ئاماژه‌ی بۆ ئه‌مه‌ش كردووه‌ كه‌ هێزەکانی پێشمەرگە لەو ئۆپەراسێۆنەدا، کێوماڵێکی وردی گوندەکانی (شۆراو، دەراجە، بەلەکەی سەروو، بەلەکەی خواروو، دۆڵی گولم کەوە، گوندی قۆری چایی) لە میحوەری دووی قەرەتەپە و گوندەکانی (قوبەلبن، معدانەکان، هۆدەلی، تەپەکزن، خدران، بشر) لە میحوەری یەکی گەرمەسێریان کردووەو تائێستاش هیچ رووبەڕوبوونەوەیەکی راستەوخۆ، لەنێوان پێشمەرگە و پاشماوەی چەکدارانی داعش درووست نەبووە.

جێگای ئاماژه‌ پێدانه‌ لەو ئۆپەراسیۆنەدا، لە میحوەری گەرمەسێرەوە هەریەک لە لیواکانی (3 و 5 ) پیادەو لە میحوەری دووی قەرەتەپەوە لیواکانی( 9 و 17) پیادەی سەر بە وەزارەتی پێشمەرگە، لەگەڵ چەند یەکەیەکی هێزەکانی(70)، بەشداریی تێدا دەکەن.