كرمانج عه‌بدوڵا: له‌ ماوه‌ی 24 كاتژمێردا دۆخی گوندی لهێبان ئاسایی ده‌بێته‌وه‌

 

كرمانج عه‌بدوڵا به‌رپرسی لقی 23ی قه‌ره‌چووغی پارتی دیموكراتی كوردستان ڕایگه‌یاند، له‌ ماوه‌ی 24 كاتژمێری داهاتوودا هێزی پێشمه‌رگه‌ی كوردستان دۆخی گوندی لهێبان یه‌كلایی ده‌كاته‌وه‌ و خه‌ڵكی گونده‌كه‌ به‌ سه‌ربه‌رزی ده‌چنه‌وه‌ ناوچه‌كانیان.

به‌رپرسی لقی 23 تایبه‌ت بۆ (كوردستان تیڤی) ڕایگه‌یاند: چه‌ند چه‌كدارێكی تیرۆریستانی داعش سه‌رله‌ئێواره‌ی ئه‌مڕۆ دوای نوێژی مه‌غریب چوونه‌ته‌ نێو گوندی لهێبان دوای ئه‌وه‌ی خه‌ڵكی گونده‌كه‌ شوێنه‌كانیان جێهێشت و چۆڵیان كردبوو.

ڕاشیگه‌یاند: سه‌رۆك بارزانی و سه‌رۆكی حكوومه‌تی هه‌رێمی كوردستان هه‌ر له‌ ئێواره‌وه‌ له‌سه‌رخه‌تن و ئێمه‌ش بۆ هه‌موو خه‌ڵكی گوندی لهێبان‌ و هه‌رێمی كوردستان ته‌ئكید ده‌كه‌ینه‌وه‌ كه‌ له‌ ماوه‌ی 24 كاتژمێری داهاتوودا بارودۆخه‌كه‌‌ یه‌كلایی ده‌بێته‌وه‌ و پێشمه‌رگه‌ ده‌چێته‌ گونده‌كه‌ و ته‌واوی ئه‌م ناوچانه‌.

كرمانج عه‌بدوڵا به‌رپرسی لقی 23ی قه‌ره‌چووغی پارتی جه‌ختیشی كرده‌وه‌ كه‌ تا به‌یانی پێشمه‌رگه‌ ده‌چێته‌وه‌ نێو گونده‌كه‌ و ته‌واوی گونده‌كانی بناری چیای قه‌ره‌چووغ، هه‌روه‌ها خه‌ڵكی ئه‌م گوندانه‌ش به‌سه‌ربه‌رزی دووباره‌ ده‌گه‌ڕێنه‌وه‌ سه‌ر ماڵ و حاڵی خۆیان.