ئۆپەراسیۆنە هاوبەشەکان: جەخت لە بەردەوامی هەماهەنگی لە نێوان سوپای عێراق و پێشمەرگە دەکەینەوە


فەرماندەیی ئۆپەراسیۆنە هاوبەشەکانی عێراق ئەوەی دووپات کردەوە کە هێرشەکانی داعش هەوڵێکی چەواشەکارییە بۆ سەلماندنی بوونی خۆیان و هاوکات جەخت لە بەردەوامیی هەماهەنگی لەنێوان سوپای عێراق و هێزەکانی پێشمەرگە لە پارێزگاکانی دیالە، کەرکووک و نەینەوا دەکات.
شانەی ڕاگەیاندنی ئەمنی لەسەر هێرشیتیرۆریستانی داعش بوسەر ناوچەی سەرگەڕان و قەرەچووغ کە بەهۆیەوە ژمارەیەک هاووڵاتیی شەهید و برینداربوون و لەکاتی ئۆپەراسیۆنی راوەدوونانی تیرۆریستانیشدا، ژمارەیەک پێشمەرگە شەهید و برینداربوون، راگەیەندراوێکی بەناوی فەرماندەیی ئۆپەراسیۆنە هاوبەشەکانی عێراقەوە بڵاوکردەوە.
لە راگەیەندراوەکەدا هاتووە: لە هەوڵێکی چەواشەکاریدا بۆ سەلماندنی بوونی خۆیان کە تیرۆریستان تەنیا خۆیان هەڵدەخەڵەتێنن، بە شێوازێکی ترسنۆکانە کە رەنگدانەوەی بێدەسەڵاتیی خۆیان و شوێنکەوتووانیان نیشاندا لە رووبەڕوویان بەرامبەر هێزە ئەمنی و سەربازییەکان لە سەرانسەری نیشتمان، ئەمەش دوای لێدانی گورزی کەمەرشکێن و هەستیار لە رێگەی بەدواداچوونی هەواڵگیریی سەرکەوتوو لە دژی پاشماوە هەلهاتووەکانیان.
لەبارەی پەلاماری تیرۆریستانی داعش بۆسەر گوندی خدرجیجە لە دامێنی چیای قەرەچووغ، فەرماندەیی ئۆپەراسیۆنە هاوبەشەکانی عێراق دەڵێت: لە دوا هەوڵی ترسنۆکانەیاندا، دەستی چەپەڵیان گەیاندە گوندی خدر جیجە لە قەدباڵی چیای قەرەچووغ و لە ئەنجامی کردەوەیەکی وەحشیگەرانەدا ژمارەیەک هاوڵاتیی سڤیلی بێتاوان و ژمارەیەکی دیکە پێشمەرگەیان شەهید و بریندار کرد.
لە راگەیەندراوەکەدا جەخت لە بەردەوامیی هەماهەنگی لەنێوان سوپای عێراق و هێزەکانی پێشمەرگە کراوەتەوە و تیایدا هاتووە: لە کاتێکدا فەرماندەیی ئۆپەراسیۆنە هاوبەشەکان سەرەخۆشی لە رۆڵەکانی گەلە ستەمدیدەکەمان دەکات، بەبۆنەی شەهیدبوونی دەستەیەک لە رۆڵەکانی، هاوکات جەخت لە هەماهەنگی و هاریکاری گەورە و بەردەوام لە نێوان هێزەکانی سوپای عێراق و هێزەکانی پێشمەرگە دەکات لە پارێزگاکانی دیالە، کەرکووک و نەینەوا و بە درێژایی ناوچە ئەمنییە هاوبەشەکان بۆ تۆڵەسەندنەوەی خوێنی شەهیدان و لەناوبردنی تیرۆریستان و راوەدوونانیان لە مۆڵگە و حەشارگەکانیان، رەهەندی هەماهەنگییەکان فراواتر دەکرێن.