یانەی وەرزشی هەولێر ڕوونکردنەوەیەک سەبارەت بە دڕاندنی ئاڵای عێراق بڵاو دەکاتەوە

 

یانەی وەرزشی هەولێر لە ڕاگەیانراوێکدا ئەو تۆمەتانە ڕەت دەکاتەوە کە گوایە ئاڵای عێراق لە یاریگەکە دڕێنرابێت.

یانەی وەرزشی ئەمڕۆ شەممە ڕایگەیاند: دوای سەرکەوتنی یانەی هەولێر لە یاری ئەمڕۆ بەرامبەر بە یانەی شوڕتە لە قۆناخی 16ـی جامی عێراق، لەگەڵ ئەوەی ئێمە وەک یانەی هەولێر و دەستەی هاندەرانمان بە جوانترین شێوە لە پێشوازییان بووین، بەڵام بەداخەوە هاندەرانی یانەی میوان بەرگەی دۆڕانەکەیان نەگرت و لە خۆشی هاندەرانی یانەی هەولێریان کەمکردەوە و هەڵسان بە شکاندنی ژمارەیەکی زۆر لە کورسییەکی یاریگەی فڕەنسۆ هەریری.

هەروەها ڕایگەیاند: بەداخەوە هەندێک لە ڕاگەیاندنکاران و جەماوەری یانەی شوڕتە، دەیانەوێ بابەتەکە بەلاڕێدا ببەن گوایە ئاڵای عێڕاق لە یاریگە دڕاوە، ئێمە وەک یانەی هەولێر بە هەموو شێوەیەک ئەو تۆمەتانە ڕەت دەکەینەوە و ئەمە زۆر دوورە لە ڕاستی.

جێی باسە ئەمڕۆ شەممە لە جامی عێراقدا یاری نێوان یانەی هەولێر و شوڕتە بەڕێوەچوو، لە ئەنجامدا یانەی هەولێر بە لێدانی یەکلاکەرەوە سەرکەوتنی بەسەر یانەی شوڕتە بەدەستهێنا و توانی بگاتە قۆناغی هەشتەم، ئەمەش بووە هۆی تووڕەکردنی هاندەران و لە ئەنجامدا گرژی لێکەوتەوە.