دوو لیوای دیکەی پێشمەرگە بە شێوەی چەکی بانکی مووچەکانیان وەرگرت

 

لە چوارچێوەی بەرنامەی چاکسازی هەردوو لیوای 2 و 4ـی وەزارەتی پێشمەرگە مووچەکانیان بە شێوەی چەکی بانکی وەرگرت.

وەزارەتی پێشمەرگە ڕایگەیاند: بەڕێوەبەرایەتی گشتی ژمێریاری سەربازی ئەمڕۆ چوارشەممە بە هەماهەنگی لەگەڵ بەڕێوەبەرایەتی چاکسازی و پاڵپشتی ڕاوێژکاری سەربازی وڵاتی هۆڵەندا، سەرپەرشتی دابەشکردنی مووچەی هەردوو لیوای 2 و 4ـی پیادەی وەزارەتیان کرد کە بەشێوەی چەکی بانکی دابەشکرا.

هەروەها ڕایگەیاند: عەمید توانا سدیق بەڕێوەبەری گشتی ژمێریاری سەربازی بۆ ئەم مەبەستە بە مەیدانی سەردانی بانکی گارەی کرد لە شاری دهۆک، بۆ چاودێریکردنی شێوازی دابەشکردنی مووچەی لیوای 4ـی پیادە.

ئاماژەی بەوەش کرد کە وەزارەتی پێشمەرگە لە چوارچێوەی بەرنامەی چاکسازی سەرجەم یەکە ئیدارییەکانی شێوازی مووچە وەرگرتنیان بۆ سیستەمی چەکی بانکی جێبەجێکردووە، لە مانگی پێشوودا لیوای 1ـی پیادەش بەم شێوەیە موچەکانییان وەرگرت، لەم مانگەشدا هەردوو لیوای 2 و 4  بەو شێوەیە مووچەیان وەرگرت.

هەروەها کۆڵۆنێڵ ڤۆس پاوڵ ڕاوێژکاری سەربازی وڵاتی هۆڵەندا، بەرێوەچوونی پڕۆسەکەی بەسەرکەوتوو ئەژمارکرد و پاڵپشتی وڵاتەکەی بۆ سەرخستنی پرۆسەی چاکسازی وەزارەتی پێشمەرگە دووپاتکردەوە.