وه‌زیرێ كاره‌بێ: مه‌ شه‌ش ژێده‌ر بۆ به‌رهەمئینانا كاره‌با نیشتمانى یێن ھەین


ئه‌ڤرو سپێدێ 17-10-2021 كمال محمد صالح وه‌زیرێ كاره‌بێ یێ حكومه‌تا هه‌رێما كوردستانێ سه‌را كوچكا پارێزگه‌ها دهۆكێ دا ژلایێ به‌رێزان ماجد سه‌ید صالح وشمعون شلیمون جێگرێن پارێزگارێ دهۆكێ پێشوازى لێ هاته‌ كرن.
دهه‌ڤدیته‌نه‌كێدا ب ئاماده‌بونا رێڤه‌به‌رێن په‌یوه‌ندیدار به‌حسێ ره‌وشا كاره‌بێ ل پارێزگه‌هێ وپلانێن وه‌زاره‌تێ بو زێده‌كرنا رێژا گشتى یا كاره‌بێ وژێده‌رێن به‌رهه‌مئینانا ووزا كاره‌بێ وبه‌رنامێ دانانا پێڤه‌رێن زیره‌ك بو باشتر رێكخستنا كاره‌بێ هاته‌ كرن.
وه‌زیرێ كاره‌بێ دیاركر كو ل دووڤ به‌رنامێ كابینا نه‌هێ یا حكومه‌تا  هه‌رێمێ گرنگییه‌كا تایبه‌ت ب دابینكرنا ووزا كاره‌بێ هاتیه‌ دانان ونوكه‌ كار ل سه‌ر چه‌ندین پرۆژێن ستراتیجى یێن به‌رهه‌مئینانا كاره‌بێ دهێته‌ كرن وهنده‌ك ل دوماهیا ئه‌ڤ ساڵه‌ دێ كه‌ڤنه‌ دخزمه‌تێ دا وره‌وشا كاره‌بێ ژى وده‌م ژمێرێن وێ دێ هێنه‌ زێده‌كرن ونوكه‌ مه‌ شه‌ش ژێده‌ر هه‌نه‌ بو به‌رهه‌مئینانا كاره‌با گشتى وخواست كو هاولاتى ژى ئابورێ دكاره‌بێدا بكه‌ن دا پتر مفا ژێ بهێته‌ وه‌رگرتن. 
هه‌ردوو جێگرێن پارێزگارى خوشحالیا خو ب سه‌ره‌دانێ دیاركرن وده‌ست خوشى ل وه‌زیرێ كاره‌بێ وستافێ وه‌زارتێ كرن هه‌مبه‌ر هه‌ول وبزاڤێن وان بوراكێشانا بوریه‌كا غازێ بو وێسدگه‌ها به‌رهه‌مئینانا كاره‌بێ ل كواشێ وزێده‌كرنا ژێده‌رێن به‌رهه‌مئینانا كاره‌بێ هه‌روه‌سا پشته‌ڤانیا پارێزگه‌هێ نیشان دا بو بجهئینانا به‌رنامه‌ و وپلانێن وه‌زاره‌تێ نه‌خاسمه‌ بو دانانا پیڤه‌رێن زیره‌ك ل پارێزگه‌هێ بو وێ یه‌كێ به‌رهه‌م وده‌مژمێرێن كاره‌با نیشتمانى بهێنه‌ زێده‌كرن.