دوای پەیوەندییە تەلەفۆنییەکەی نێوان مەسرور بارزانی و کازمی دەستگیرکراوانی کەرکووک ئازاد کران

لەدوای پەیوەندییە تەلەفۆنییەکەی سەرۆکوەزیرانی هەرێمی کوردستان لەگەڵ سەرۆکوەزیرانی عێراق هێزەکانی سەر بە سوپای عێراق کشانەوە و  دەستگیرکراونیش ئازاد کران.

ئەمڕۆ چوارشەممە 13ـی تشرینی یەکەمی 2021، سەرۆکوەزیرانی هەرێمی کوردستان و سەرۆکوەزیرانی عێراق پەیوەندییەکی تەلەفۆنیان ئەنجامدا و هەردوولا هاوڕابوون لە ئاساییکردنەوەی دۆخی کەرکووک و ڕێگە نەدان بە پشێوی لە پارێزگەکەدا.

مستەفا کازمی سەرۆکوەزیرانی عێراق هەر لە پەیوەندییە تەلەفۆنییەکەدا بە مەسرور بارزانی ڕاگەیاند بڕیاری ئازادکردنی دەستگیرکراوانی کەرکووک دەدات و دۆخەکە ئاسایی دەکەنەوە.

بەپێی زانیارییەکانی ماڵپەڕی کوردستان تیڤی، کەمێک بەر لە ئێستا هێزە ئەمنییەکان لە کەرکووک دەرچوون و هەروەها دەستگیرکراوان ئازاد کراون.

هەر بەپێی زانیارییەکان، ئێستا دۆخی گەڕەکی شۆریجە و ڕەحیماوەش ئاسایی بوونەتەوە.

جێی باسە، شەوی ڕابردوو لەکاتی ئاهەنگێرانی ئەندام و لایەنگرانی پارتی دیموکراتی کوردستان بەبۆنەی سەرکەوتنیان لە هەڵبژاردن، چەند گێرەشێوێنێک کە کادیر و ئەندامی دەزگای ئەمنی لایەنێکی دیکە بوون خۆیان خزاندە نێو ئاهەنگە بەمەبەستی دروستکردنی ئاژاوە و پشێوی چەکیان بەرامبەر بە خەڵکی مەدەنی و هێزەکان بەکارهێنا، ئەمەش بووە هۆکاری ئەوەی سەدان گەنجی بێ تاوان دەستگیر بکرێن.