سه‌رۆكى هه‌رێمى كوردستان نامه‌یه‌كى له‌ پاپاى ڤاتیكانه‌وه‌ پێده‌گات

‌له‌ نامه‌یه‌كدا بۆ نێچیرڤان بارزانى، قه‌داسه‌تى پاپا فره‌نسیس پاپاى ڤاتیكان سوپاسگوزاریى خۆى بۆ ئه‌و پێشوازییه‌ گه‌رمه‌ ده‌رده‌بڕیت كه‌ له‌ كاتى سه‌ردانیدا لێى كرا و ستایشى كولتوورى پێكه‌وه‌ژیان و ته‌بایى و یه‌كترقبووڵكردنى نێوان ئایین و پێكهاته‌كان له‌ هه‌رێمى كوردستان ده‌كات.

پاشنیوه‌ڕۆى ئه‌مڕۆ دووشه‌ممه‌ 2021/4/12 به‌ڕێز نێچیرڤان بارزانى، سه‌رۆكى هه‌رێمى كوردستان له‌ شوێنى مانه‌وه‌ى له‌ به‌غدا پێشوازى له‌ به‌ڕێز میتیا لێسكۆڤار باڵیۆزى ڤاتیكان له‌ عێراق كرد.

له‌ دیدارێكدا به‌ڕێز باڵیۆزى ڤاتیكان خۆشحاڵى به‌ سه‌ركه‌وتنى سه‌ردانى قه‌داسه‌تى پاپا بۆ عێراق و هه‌رێمى كوردستان ده‌ربڕى و سوپاسگوزاریى خۆى بۆ به‌رنامه‌ و ڕێكوپێكیى ئاماده‌كارى و به‌ڕێوه‌چوونى سه‌ردانه‌كه‌ ده‌ربڕى. به‌ڕێز سه‌رۆكى هه‌رێمى كوردستانیش سه‌ردانه‌كه‌ى به‌ گرنگ له‌ قه‌ڵه‌م دا و دووپاتى كرده‌وه‌ ده‌بێ هه‌مووان له‌ عێراق سوود له‌ سه‌ردانه‌كه‌ و په‌یامه‌كانى وه‌ربگرن كه‌ په‌یامى ئاشتى و ڕێز و لێبورده‌یى بوون.

هه‌ردوولا جه‌ختیان له‌ گرنگیی پته‌وكردنى گیان و كولتوورى ته‌بایى و پێكه‌وه‌ژیان و یه‌كترقبووڵكردن كرده‌وه‌ و سه‌رۆك نێچیرڤان بارزانى دووپاتى كرده‌وه‌ كه‌ ئه‌وه‌ كولتوورێكى‌ دێرینى گه‌لى كوردستانه‌ و هه‌رێمى كوردستان وه‌ك هه‌میشه به‌ لانه‌یه‌كى ئارام بۆ هه‌موو ئایین و پێكهاته‌كان ده‌مێنێته‌وه‌.

له‌ دیداره‌كه‌دا به‌ڕێز باڵیۆزى ڤاتیكان نامه‌یه‌كى قه‌داسه‌تى پاپاى گه‌یانده‌ سه‌رۆك نێچیرڤان بارزانى، ئه‌مه‌ ده‌قه‌که‌یه‌تی:

جه‌نابى سه‌رۆك به‌ڕێز نێچیرڤان بارزانى ـ ى هێژا

سه‌رۆكى هه‌رێمى كوردستانى عێراق

سڵاوێكى برایانه‌..

خۆشحاڵم سڵاوى برایانه‌م پێشكه‌ش به‌ جه‌نابتان بكه‌م و هیواى كامه‌رانى بۆ ئێوه‌ و گه‌لى خۆشه‌ویستتان بخوازم، هیوادارم خۆتان و ته‌واوى هاوكارانتان هه‌میشه‌ له‌ ته‌ندروستى و سه‌لامه‌تى و به‌خششدا بن.

حه‌ز ده‌كه‌م بۆ جه‌نابتان و ته‌واوى کاربه‌ده‌ستان له‌گه‌ڵ ئێوه‌ و هه‌موو گه‌لى عێراق، به‌تایبه‌تى دانیشتوانى خۆشه‌ویستى كورد، هه‌ستى قووڵی سوپاسگوزاریم بۆ ئه‌و پێشوازى و میواندارییه‌ گه‌رمه‌ ده‌رببڕم كه‌ له‌ خۆم و یاوه‌رانى منتان كرد، هه‌روه‌ها هیوادارم سڵاو و ڕێزم به‌ جه‌نابی به‌ڕێز مه‌سروور بارزانى، سه‌رۆكى ئه‌نجومه‌نى وه‌زیرانى كوردستانى عێراق بگه‌یه‌نن. سوپاستان ده‌كه‌م كه‌ خۆتان به‌شداریتان له‌ نوێژ و قوداسه‌كه‌ماندا له‌‌ یاریگاى فره‌نسۆ هه‌ریرى له‌ هه‌ولێر كرد، ئه‌وه‌ نیشانه‌ى گیانى ته‌بایى و لێبورده‌یى و برایه‌تى و مرۆییتانه‌.

ئه‌و ڕۆژانه‌ى له‌گه‌ڵ ئێوه‌دا به‌سه‌رم بردن، هه‌ستم كرد ئه‌و فره‌ئایینى، فره‌كولتوورى و فره‌نه‌ته‌وه‌یییه‌ى كۆمه‌ڵگه‌ى عێراقى هه‌یه‌تى، پشتیوانییه‌كى گه‌وره‌ى ئێوه‌ و جیهانیشه‌. ئه‌مڕۆ چاوه‌ڕوانی له‌ عێراق ده‌كرێت بۆ هه‌مووان و به‌تایبه‌تى بۆ ڕۆژهه‌ڵاتى ناوه‌ڕاست بسه‌لمێنێت كه‌ وێڕاى هه‌موو جیاوازییه‌‌كانیش ده‌توانێت به‌ پێكه‌وه‌یى و پێكه‌وه‌هه‌ڵكردن هاوكار بێت له‌ بنیاتنانى ژیانى مه‌ده‌نى و پته‌وكردنى په‌یوه‌ندیى برایه‌تى و هاریكارى له‌پێناو چاكه‌ و ئاشتى و گه‌شبوونى هیواى داهاتوویه‌كى باشتردا.

جه‌نابى سه‌رۆك،

ده‌مه‌وێت سوپاسگوزاریى ڕاستگۆیانه‌م ده‌رببڕم بۆ هه‌موو ئه‌و کارانه‌ى ئه‌نجامتان داوه‌ و ئه‌نجامى ده‌ده‌ن له‌پێناو جێگیركردنى ئاشتیدا و هه‌موو ئه‌وه‌ى بۆ ئایین و پێكهاته‌كانى كۆمه‌ڵگه‌ پێشكه‌شى ده‌كه‌ن. سوپاستان ده‌كه‌م و نه‌وه‌كانیش سوپاستان ده‌كه‌ن بۆ كارى باشتان له‌ خزمه‌تى چاكه‌ى گشتیدا.

له‌ خواى مه‌زن داواكارم پشتیوانى ئه‌ركه‌كانتان بێت و بۆ ڕیگه‌ى دانایى و دادگه‌رى و ڕاستى، ڕێنموونیتان بكات و ته‌ندروستى و سه‌لامه‌تى و پێشكه‌وتن و په‌ره‌سه‌ندنى به‌رده‌وامتان پێببه‌خشێت.

پاپا فره‌نسیس

15ى ئازارى 2021

ڤاتیكان

nn