کۆشکی سپی: هاوشێوەی هێرشەکانی هەفتەی رابردوو بۆ سەر میلیشیاکانی سەر بە ئێران وەڵاممان دەبێت

کۆشکی سپی راگەیەنراوێکی لەبارەی هێرشەکانی ئەمڕۆی سەر بنکەی سەربازی عەین ئەسەد لەعێراق بڵاوکردەوە رایگه‌یاند: ئەگەر پێویست بکات هاوشێوەی هێرشەکانی هەفتەی رابردوو بۆ سەر میلیشیاکانی سەر بە ئێران وەڵاممان دەبێت.

جین ساکی، گوتەبێژی کۆشکی سپی رایگەیاند: تائێستا لێکۆڵینەوە لەهێرشەکانی سەر بنکەی سەربازی عەین ئەسەد لەعێراق بەردەوامە و لەوبارەیەوە زانیاری پێویست دراوەتە سەرۆک بایدن، جەختیش دەکاتەوە دوای لێکۆڵینەوەکان ئەگەر دەرکەوت ئەو هێرشانە پێویستیان بە وەڵام هەیە، هەنگاوی پێویست دەنێن.

گوتەبێژی کۆشکی سپی باسی لەوەش کردووە، هەڵسەنگاندن بۆ زەرەر و زیانەکانی ‌هێرشە مووشەکییەکەی سەر بنکەی عەین ئەسەد بەردەوامە.

شایه‌نی باسه‌ ئەمڕۆ چوارشه‌ممه‌ 3-3-2021، چەند مووشەكێك ئاڕاستەی بنكەی سەربازی عەین ئەسەد لە پارێزگای ئەنبار كران.