سامان به‌رزنجی: له‌ هه‌فته‌ی داهاتوو قۆناغێكی دیكه‌ی ڤاكسینی كۆرۆنا ده‌گاته‌ هه‌رێمی كوردستان

شەوی رابردوو 50 هەزار ڤاکسینی کۆرۆنای سینۆفارم لە چینەوە گەیشتە عێراق و لەو بڕەش پێنج هەزاری بۆ هەرێمی کوردستان دەبێت.

لەو بارەیەوە سامان بەرزنجی وەزیری تەندروستی هەرێمی کوردستان له‌ كۆنگره‌یه‌كی رۆژنامه‌وانی هاوبه‌ش له‌گه‌ڵ كونسڵی گشتی كۆماری چین رایگەیاند: ئێواره‌ی ئه‌مڕۆ له‌بازگه‌ی شێراوه‌ یه‌كه‌م كاروانی ڤاكسینی كۆرۆنا كه‌ ژماره‌كه‌ی پێنج هه‌زار دانه‌یه‌ گه‌یشته‌ هه‌رێمی كوردستان و له‌ هه‌فته‌ی داهاتوو قۆناغێكی دیكه‌ی ڤاكسینی كۆرۆنا ده‌گاته‌ هه‌رێمی كوردستان.

گوتیشی، بەمزووانە میکانیزمی دابەشکردنی ڤاکسین بە فەرمی رادەگەیه‌نین، جه‌ختیشی كرده‌وه‌ سەرەتا كارمه‌ندانی ته‌ندروستی ڤاكسینه‌كه‌ وه‌رده‌گرن و دواتر ئەوانەی به‌ساڵاچوون و نەخۆشی درێژخایەنیان هەیە ئه‌م ڤاكسینه‌ وه‌رده‌گرن. 

له‌لایه‌ن خۆیه‌وه‌ كونسلی چین رایگه‌یاند: سه‌ره‌ڕای كه‌می ڤاكسین له‌ هه‌موو جیهان به‌ڵام بۆ نیشاندانی دۆستایه‌تیمان له‌گه‌ڵ هه‌رێمی كوردستان بڕیارماندا یه‌كه‌م كاروانی ڤاكسین ره‌وانه‌ی هه‌رێمی كوردستان بكه‌ین.