لیڤه‌رپول چواره‌م یاری له‌سه‌ریه‌كی له‌پریمه‌رلیگ دۆڕاند


یانه‌ی لیڤه‌رپول پاڵه‌وانی وه‌رزی ڕابردووی خولی یانه‌كانی ئینگلته‌را له‌ ئه‌نجامه‌ خراپه‌كانی به‌رده‌وامه‌و چواره‌م یاری له‌سه‌ریه‌كی دۆڕاند.
 له‌ هه‌فته‌ی بیست وپێنجه‌می پرێمه‌رلیگ و له‌ یاری دێربی مێرسیساید، یانه‌ی لیڤه‌رپول له‌سه‌ر یاریگای خۆی به‌ دوو گۆڵی بێ به‌رامبه‌ر به‌ یانه‌ی ئێڤێرتۆنی میوانی و هاوشاریه‌كه‌ی دۆڕا.
دوای تێپه‌ڕبوونی سێ خوله‌ك به‌سه‌ر فیكه‌ی ده‌ستپێكی یاری، ڕیشارلیسۆنی به‌ڕازیلی گۆڵێكی بۆ ئێڤێرتۆن تۆماركرد، دوای ئه‌م گۆڵه‌ش یاریزانانی لیڤه‌رپول هه‌وڵی یه‌كسان كردنه‌وه‌ی ئه‌نجامی یاریاندا، به‌ڵام هه‌وڵه‌كانیان بێ ئاكام بوو، له‌ خوله‌كی هه‌شتاویه‌كیش، ناوبژیوان لێدانێكی سزای بۆ ئێڤێرتۆن هه‌ژماركردو له‌ جێبه‌جێ كردنی لێدانه‌كه‌دا، ناوه‌ڕاستكاری ئایسله‌ندی گیلفی سیگوردسۆن گۆڵی دووه‌می تیپی میوانی به‌ده‌ستهێنا.
 به‌م بردنه‌وه‌ش كۆی خاڵه‌كانی ئێڤێرتۆن له‌ پله‌ی حه‌وته‌می ڕیزبه‌ندی یانه‌كان بۆ چل خاڵ به‌رزبووه‌وه‌و به‌ جیاوازی گۆڵ له‌ دوای لیڤه‌رپول دێت و یاریه‌كی دواخراویشی ماوه، لیڤه‌رپولیش به‌ چل خاڵ له‌ پله‌ی شه‌شه‌می ڕیزبه‌ندی مایه‌وه‌ .