بۆ گفتوگۆكردن له‌باره‌ی ئایینده‌ی عێراق كازمی و پۆمپیۆ په‌یوه‌ندییه‌كی ته‌له‌فۆنیان ئه‌نجامدا

ئه‌مڕۆ سێشه‌ممه‌ مایك پۆمپیۆ وه‌زیری ده‌ره‌وه‌ی ویلایه‌ته‌ یه‌كگرتووه‌كانی ئه‌مه‌ریكا و مسته‌فا كازمی سه‌رۆكوه‌زیرانی عێراق په‌یوه‌ندییه‌كی ته‌له‌فۆنیان ئه‌نجامدا. 

له‌وباره‌وه‌ نووسینگه‌ی راگه‌یاندنی سه‌رۆكی ئه‌نجوومه‌نی وه‌زیرانی عێراق له‌ به‌یاننامه‌یه‌كدا رایگه‌یاند: له‌ كاتی ئه‌نجامدانی په‌یوه‌ندییه‌ ته‌له‌فۆنییه‌كه‌دا هه‌ردوولا گفتوگۆیان له‌باره‌ی په‌یوه‌ندییه‌كانی نێوان هه‌ردوو وڵاته‌كه‌ كردووه‌ و هه‌روه‌ها په‌ره‌سه‌ندنه‌كانی بارودۆخی ناوچه‌كه‌یان تاوتوێ كردووه‌. 

هاوكات له‌ په‌یوه‌ندییه‌ ته‌له‌فۆنییه‌كه‌دا گفتوگۆیان له‌باره‌ی به‌ره‌وپێشبردنی هه‌ماهه‌نگی نێوانیان له‌ بواره‌ جیاوازه‌كان كردووه‌‌. 

به‌گوێره‌ی به‌یاننامه‌كه‌ كازمی و پۆمپیۆ له‌باره‌ی ئاینده‌ی هه‌ماهه‌نگی نێوان عێراق و هاوپه‌یمانی نێوده‌وڵه‌تی به‌سه‌ركردایه‌تی ئه‌مه‌ریكا له‌ژێر رۆشنایی په‌ره‌سه‌ندنی تواناكانی عێراق له‌ به‌ره‌نگاربوونه‌وه‌ی تیرۆر گفتوگۆیان كردووه‌.