بە چەند رێگایەکی سرووشتی کێشەکانی هەرس چارەسەر بکە

بەهۆی ناتەندروستی ژەمەکان یاخود بوونی فشارێکی دەروونی زۆر، ئەگەر هەیە سیستمی هەرسمان تێکبچێت کە دیارترین نیشانەکانی بریتیە لە تووندبوونی گەدە، دڵە کزێ، هەستی رشانەوە، غازات، سکچوون و قەبزی.

ماڵپەڕی تەندروستی مێدیکاڵ نیوز تودەی، چەند رێگایەکی بۆ کەمکردنەوەی کێشەکانی هەرس خستووەتەڕوو:
فشاری دەروونی
یەکێتی دەرووناسی ئەمەریکا لە توێژینەوەیەکیدا ئاماژەی بەوەداوە، یەکێک لە هۆکارە سەرەکییەکانی تێکچوونی کرداری هەرس، بوونی فشار دەروونی و خەمناکییە.
ئەو یەکێتییە دەڵێت، ئەگەر هەر کێشەیەکت هەیە کە کاریگەری لەسەر دروستکردوویت، دەبێت زوو چارەسەری بکەیت.
ئاماژەی بەوەشکردووە، بوونی کەسانی ئازیز لە دەوروبەرت، وەرزشکردن و خەوی تەندروست، هاوکاری کەمکردنەوەی فشاری دەروونی دەدەن.
چای نەعناع
چای نەعناع یارمەتی ئەو کەسانە دەدات کە کرداری هەرسیان تەواو نییە و تووشی هەستی رشانەوە و دڵە کزێ دەبن ئەمەش بەهۆی ئەو پێکهاتە تەندروستەی تێیدایە.
پیاسەکردن
پیاسەکردن هاوکاری کرداری هەرس دەدات بە تایبەت بۆ ئەو کەسانەی کێشەی غازات و قورسبوونی گەدەیان هەیە.
غازات
مرۆڤ لە خواردن و خواردنەوە هەوا قووت دەدات. هەروەها لەشی مرۆڤ کاتی هەرسکردنی خۆراک، غاز دروست دەکات کە ئەمەش هەندێکجار دەبێتە هۆی تێکچوونی کرداری هەرس.
ئەو شتانەی دەبنە هۆی زیادبوونی غازات:
جوینی بنێشت
خواردنەوە گازییەکان
خێرا خواردن
بەکارهێنانی تاقمی ددان کە بۆ دەمت گونجاو نییە
خواردنی برۆکلی، فاسۆلیا، پیاز، سێو و ماست
فایبەر زۆر بخۆ
خواردنی زۆری فایبەر سوودی زۆری بۆ کرداری هەرس هەیە، جیا لەوەش سوودی بۆ کەمکردنەوەی کۆلیسترۆل هەیە.
سەرچاوەی سەرەکی فایبەر دانوێڵە و سەوزە و میوەیە.
لەم خۆراکانەش بەدوور بە:
خواردنی پەستێنراوە
بەهارات
خواردنی سوورەکراوە
سرکە و خواردنە ترشەکان
خواردنەوە کحولییەکان
کافێین

ژێده‌ر: هه‌ولێر