شارەوانی هەولێر: لێژنه‌یه‌ك بۆ تاپۆکردنی خانووە زێدەڕۆکان پێكهێندراوه‌ 

دوای ئەوەی لە پەرلەمانی کوردستان بڕیاری تاپۆکردنی خانووی زێدەڕۆ پەسەند کرا ئێستا وەزارەتی شارەوانی و پارێزگاکان سەرقاڵی ئامادەکارین بۆ دانانی میکانیزمێک بۆ دەستپێکردنی پرۆسەی تاپۆکردنی خانووە زێدەڕۆکان.

سیامەند کەریم، گوتەبێژی سەرۆکایەتی شارەوانی هەولێر بە کوردستان تیڤی ڕاگەیاند: لیژنەیەک لە پارێزگای ھەولێر بۆ تاپۆکردنی خانووی زێدەڕۆ پێک ھاتووە و بەگوێرەی یاسای تاپۆکردنی خانووی زێدەڕۆ ھەموو ئەو خانووانەی بەرلە ساڵی ٢٠١٩ لەسەر موڵکی حکوومەت بە زێدەڕۆ دروست کراون، تاپۆ دەکرێن.

ڕاشیگەیاند:" ڕێکارەکانی تاپۆکزدنی خانووی تەجاوز ئاسان نیە کارکردنی دەوێت هەروەها پێویستی بە تیمێکی فراوان هەیە بۆئەوەی بە میکانیزمێکی گونجا و دەست بە کارەکان بکرێت بۆیە نابێت پەلە لە جێبەجێکردنی بکرێت بەڵام هەر کاتێک کارەکان تەواو بوو ئەوە دەست بە تاپۆکردن دەکرێت.

ئاماژەی بەوەشدا:" ھەرکەسێک زێدەڕۆیی بکاتە سەر زەویی شارەوانی لە ماوەی ٢٤ کاتژمێردا لێپرسینەوەی لەگەڵ دەکرێت و زێدەڕۆییەکەی تێک دەدرێت و ڕووبەڕووی یاسا دەکرێتەوە، لەبەر ئەوەش، بە ھیچ شێوەیەک ڕێگە نادەین، خەڵکێک زێدەڕۆیی بکاتە سەر موڵکی حکوومەت.