پۆلیسی هه‌ولێر دوو تۆمه‌تباری ده‌ستگیركرد له‌ناو بازاڕ ته‌قه‌یه‌كی زۆریان كردبوو

به‌ چه‌ك رووبه‌ڕووی پۆلیس ببوونەوە

هێزه‌كانی پۆلیسی هه‌ولێر له‌ بازاڕی قه‌یسه‌ری شاری هه‌ولێر توانیان دوو تۆمه‌تبار ده‌ستگیربكه‌ن، كه‌ به‌ چه‌ك رووبه‌ڕووی پۆلیس بوونه‌وه‌ و ته‌قه‌یه‌كی "زۆریان" كرد.

هێزەكانی بەڕێوەبەرایەتیی پۆلیسی هەولێر، دوێنێ كاتژمێر (2:30) شەو لەناو بازاڕی قەیسەری، لە كاتی ئەركی فەرمیی خۆیان بۆ پاراستنی ئەمنیەتی ئەم شوێنە گرنگانە كە سامانێكی زۆری هاووڵاتیانی تێدایە، لەگەڵ دوو تۆمەتبار بە ناوەكانی (ح.ل.ح) و (م.ف.ا) رووبەڕووبوونەوە، كە پێشینەی تاوانیان هەبوو و ئەفسەرێك و دوو كارمەندیش زۆر بە بوێرانە و سەرەڕای زامداربوونیان، توانییان بەرەنگاری دوو تۆمەتبارەكە ببنەوە و بە هاوبەشی لەگەڵ تیمەكانی پۆلیسی هەولێر، دەستگیریان بكەن.

تۆمەتبارەكان بە ئاڕاستەی پێچەوانە ئۆتۆمبێلیان لێخوڕیوە و بە چەكی جۆری كڵاشینكۆف "75"ی و دەمانچەیەكی جۆری (تارق) تەقەیەكی زۆریان كردبوو و رووبەڕووی پۆلیس ببوونەوە، بەڵام هێزەكانی پۆلیسی هەولێر، دەستبەجێ لێیان هاتنە دەست و وێڕای دەستگیركردنی تۆمەتباران، دەست بەسەر چەكەكان و ئۆتۆمبێلەكەشیاندا گیرا، ئێستاش تۆمەتباران بەپێی ماددە (405/31) لە یاسای سزادان، بەند كراون و رووبەڕووی یاسا كراونەتەوە.

پۆلیس هەمیشە خزمەتكاری هاووڵاتیان و پارێزەری سەروماڵیانە و بەردەوامیش چاوكراوەیە بۆ پاراستنی ئەمنییەتی شاری هەولێر.