وه‌زاره‌تى ناوخۆ هۆشداری له‌ باره‌ی سه‌رپێچیكردن له‌ بڕیارو رێنماییه‌كانی خۆپارێزی له‌ كۆرۆنا ده‌دات

راگه‌یه‌ندراوێكی نوێ له‌ وه‌زاره‌تی ناوخۆوه‌

وه‌زاره‌تی ناوخۆی حكومه‌تی هه‌رێمی كوردستان له‌ راگه‌یه‌ندراوێكدا، هۆشداری دا له‌ باره‌ی سه‌رپێچیكردن له‌ بڕیار و رێنماییه‌كانی تایبه‌ت به‌ خۆپارێزی له‌ په‌تای كۆرۆنا و رایگه‌یاند، ئێمه‌ لێره‌دا هۆشدارییه‌كی توند ده‌ده‌ینه‌ هه‌موو ئه‌وانه‌ی به‌ ئاشكرا داوای سه‌رپێچیكردنی یاسا و رێنماییه‌كان ده‌كه‌ن.

له‌ راگه‌یه‌ندراوه‌كه‌دا هاتووه‌: ئێمه‌ له‌ كاتێكدا سووپاسی خۆڕاگری و پێگیربوونی هاووڵاتیانی هه‌رێمی كوردستان ده‌كه‌ین و داواشیان لێده‌كه‌ین له‌ پێناو سه‌لامه‌تی خۆیان و به‌رژه‌وه‌ندی گشتی به‌رده‌وامبن له‌ پابه‌ندبوون به‌ رێكار و رێنماییه‌ ته‌ندروستییه‌كان بۆ ئه‌وه‌ی به‌ هاوكاری هه‌موو لایه‌ك ئه‌م دۆخه‌ سه‌خته‌ تێپه‌ڕێنین.

هه‌روه‌ها هاتووه‌: به‌ داخه‌وه‌ له‌م چه‌ند رۆژانه‌دا خه‌ڵكانێكی نابه‌رپرس، به‌ ئاشكرا داوای سه‌رپێچیكردنی یاسا و پابه‌ندنه‌بوون به‌ رێكار و رێنماییه‌ ته‌ندروستییه‌كان ده‌كه‌ن و هانی خه‌ڵك ده‌ده‌ن بۆ خۆپیشاندان و گردبوونه‌وه‌ و ده‌یانه‌وێت بۆ مه‌به‌ستی تایبه‌تی خۆیان، به‌رژه‌وه‌ندی گشتیی رووبه‌ڕووی مه‌ترسی بكه‌نه‌وه‌ و ئه‌مه‌ هه‌وڵێكه‌ بۆ بڵاوكردنه‌وه‌ی ڤایرۆسی كۆرۆنا و تاوانێكه‌ به‌رامبه‌ر به‌ خه‌ڵكی كوردستان.

له‌ به‌شێكی دیكه‌ی راگه‌یه‌ندراوه‌كه‌دا هاتووه‌: ئێمه‌ لێره‌دا هۆشدارییه‌كی توند ده‌ده‌ینه‌ هه‌موو ئه‌وانه‌ی به‌ ئاشكرا داوای سه‌رپێچیكردنی یاسا و رێنماییه‌كان ده‌كه‌ن كه‌ هه‌ر سه‌رپێچی و پێشێلكاری و گردبوونه‌وه‌یه‌ك، رووبه‌ڕووی لێپێچینه‌وه‌ و سزای یاساییان ده‌كاته‌وه‌، چونكه‌ به‌مكاره‌یان ته‌ندروستی خه‌ڵك و به‌رژه‌وه‌ندی گشتیی دووچاری مه‌ترسییه‌كی زۆر ده‌كه‌نه‌وه‌. داواش له‌ داواكاری گشتی ده‌كه‌ین كه‌ رێكاری پێویست به‌رامبه‌ر هه‌ر سه‌رپێچیكارێك و پێشێلكردنێكی رێكار و رێنماییه‌كان بگرێته‌به‌ر.

له‌ كۆتایی راگه‌یه‌ندراوه‌كه‌شدا هاتووه‌: هاووڵاتیانی هه‌رێمی كوردستان دڵنیا ده‌كه‌ینه‌وه‌، كه‌ حكومه‌تی هه‌رێم هه‌موو هه‌وڵێك ده‌خاته‌گه‌ڕ بۆ پاراستنیان و تێپه‌ڕاندنی ئه‌م دۆخه‌. رێگه‌ش به‌ خه‌ڵكی ئاژاوه‌گێڕ و سه‌رپێچیكار نادات دۆخی هه‌رێمی كوردستان بشێوێنن.