پۆلیسی هه‌ولێر روونكردنه‌وه‌ ده‌دات

له‌باره‌ی ده‌ستدرێژیكردنه‌وه‌ سه‌ر كچه‌ 8 ساڵانه‌كه‌


هۆگر عه‌زیز وته‌بێژی پۆلیسی هه‌ولێر له‌ په‌یجی تایبه‌تی خۆی له‌ تۆڕی كۆمه‌ڵایه‌تی فه‌یسبووك روونكردنه‌وه‌یه‌كی بڵاوكردووه‌ته‌وه‌ ده‌ڵێت: دوابه‌دوای چه‌ند وته‌یه‌كی باوكی كچێكی 8 ساڵان كه‌ گوایه‌ ده‌ستدرێژیی سێكسی كراوه‌ته‌ سه‌ر كچه‌كه‌ی.

دوابەدوای چەند وتەیەكی باوكی کچێکی (8) ساڵان كە گوایە دەستدرێژیی سێكسی كراوەتە سەر كچەكەی وە لە چەند دەزگایەكی ڕاگەیاندن كۆنگرەیەكی ڕۆژنامەنووسی بۆ ئەنجام درا، كە تیایدا باسی لەوە كردووە، کەوا پۆلیس هەڕەشەی لێ كردووە بۆ تەنازولكردن لە داوا یاساییەكەی، بەڵام ئێمە وەك پۆلیسی هەولێر، لێرەوە سەرلەبەری ئەم بابەتە ڕەت دەكەینەوە كە ئێمە هەڕەشەمان لە هیچ كەسێك کردبێت بۆ تەنازولكردن لە داوا یاساییەكەی، ئەو پەڕاوەشمان كۆتایی پێهێناوە و ڕەوانەی دادگامان كردووە.

هەروەها لە دەرئەنجامی ئەم داوا یاساییە (3) كەسمان دەستگیر كردووە و ڕووبەڕوووی یاسامان كردوونەتەوە، جگە لەوەش، سات بە ساتی لێكۆڵینەوەكانیشمان، دەستەی سەربەخۆیی مافی مرۆڤمان لێ ئاگادار كردۆتەوە و لە نزیكەوە زانیاریی تەواویان لەسەر ئەم كەیسە هەیە، ئەگەر هەر پۆلیس یان ئەفسەرێكیش، هەڕەشەی تەنازولكردنی لە هەر داوایەكی یاسایی لە هەر دادخوازێك بكات، ئەوا مافی خۆیەتی داوای یاسایی لەسەر ئەو پۆلیسە یان ئەو ئەفسەرە تۆمار بكات، بەڵام بە بەڵگەوە بێت، چونكە پۆلیس چۆن جێبەجێكاری یاسایە، وە لە هەمان كاتیشدا ئەو یاسایە بەسەریدا بێ جیاوازی جێبەجێ دەكرێت.