گوته‌بێژی ده‌سه‌ڵاتی دادوه‌ری ئێران: سندوقی ره‌شی فڕۆكه‌ ئۆكراینییه‌كه‌ ره‌وانه‌ی فه‌ره‌نسا كراوه‌

له‌رووداوه‌كه‌دا چه‌ند كه‌سێك ده‌ستبه‌سه‌ركراون

گوته‌بێژی ده‌سه‌ڵاتی دادوه‌ری ئێران، غوڵام حسێن ئیسماعیلی له‌ باره‌ی لێكۆڵینه‌وه‌كان له‌ رووداوی ئه‌و فڕۆكه‌ ئۆكراینییه‌ی رۆژی هه‌شتی ئه‌م مانگه‌ خرایه‌خواره‌وه‌، كۆنگره‌یه‌كی رۆژنامه‌وانی ساز كرد و ئه‌وه‌ی ئاشكرا كرد كه‌ سندوقی ره‌شی فڕۆكه‌كه‌ نێردراوه‌ بۆ فه‌ڕه‌نسا.

 غوڵام حسێن ئیسماعیلی راشیگه‌یاند كه‌ ماوه‌ی 72 كاتژمێر به‌سه‌ر ده‌ستپێكی لێكۆڵینه‌وه‌كاندا تێپه‌ڕیووه‌ و له‌و چوارچێوه‌یه‌دا چه‌ند كه‌سێك ده‌ستبه‌سه‌ركراون.

گوته‌بێژی ده‌سه‌ڵاتی دادوه‌ری ئێران، غوڵام حسێن ئیسماعیلی له‌باره‌ی پرسی ده‌ستبه‌سه‌ركردنی باڵیۆزی به‌ڕیتانیا له‌ تاران دوا و گوتی: "به‌شداریكردنی باڵیۆزی بریتانیا له‌ خۆپیشاندانه‌كاندا و وێنه‌گرتنی به‌هیچ شێوه‌یه‌ك مایه‌ی قبوڵكردن نییه‌.

غوڵام حسێن ئیسماعیلی ئاماژه‌ی به‌وه‌یشدا كه‌ له‌ یاسا نێوده‌وڵه‌تییه‌كاندا ئه‌م جۆره‌ كه‌سانه‌ به‌ "كه‌سانی نه‌خوازراو" ناوده‌برێن و گه‌لی ئێران چاوه‌ڕوانه‌ باڵیۆزه‌كه‌ی بریتانیا ده‌ربكرێت.