جموجۆڵی بازرگانی و هاتووچۆی گەشتیاری لە سنووری حاجی ئۆمەران بەردەوامە

25 سم بەفرباریوە و ئێستاش بەردەوامە


ئەمڕۆ شەپۆلێکی بەفربارین سنووری حاجی ئۆمەرانی گرتەوەو تا ئێستاش نزیکەی 25 سانتیمەتر بەفر باریوە.
سیروان حوسێن، گوتەبێژی کۆمەڵگەی سنووری نێودەوڵەتی حاجی ئۆمەران، بە کوردستان تیڤی ڕاگەیاند: لەگەڵ ئەم شەپۆلە بەفربارینەی سنووری نێودەوڵەتی حاجی ئۆمەرانی گرتۆتەوە، نزیکەی 25 سانتیمەتر بەفر لە مەرزی حاجی ئۆمەران باریوە، بەڵام ئاستەنگی هاتووچۆی لە سنوورەکەمان دروست نەکردووە.

گووتیشی: تیمەکانی بەفرڕاماڵین لە سنووری هەرێمی کوردستان بەردەوام خەریکی ڕاماڵینی بەفرن و ڕێگاکان پاکدەکەنەوە، جموجۆڵی بازڕگانی و هاتووچۆی گەشتیاری لەنێوان هەرێمی کوردستان و ئێران لەمەرزی حاجیئۆمەران بەردەوامی هەیە، بەڵام بەهۆی ئەوەی لەدیوی ئێران تیمەکانی بەفرڕاماڵین کەمێک سستن لەکارکردن، بۆیە بزاوتی بازرگانی وەکو ڕۆژانی ڕابردوو نییە و کەمێک سستە.

لەنێو سەنتەری حاجی ئۆمەرانیش ئەم شەپۆلە بەفرە نەبۆتە هۆکاری پەکخستنی پڕۆسەی خوێندن و ناوەندەکانی خوێندن لەم سنوورە لە دەوامی ئاسایی خۆیان بەردەوامن.
هاوکات بەپێی ئاماری هۆبەی کەشناسی لە بەڕێوەبەرایەتی کشتوکاڵی چۆمان ئەمساڵ 103 ملیمەتر باران لە سنوورەکەیان باریوە.


کەریم سمکۆ