كه‌ركووك.. به‌هۆی ته‌قینه‌وه‌یه‌ك له‌ گه‌ڕه‌كی په‌نجاعه‌لی پۆلیسێكی كورد شه‌هیدبوو و یه‌كی دیكه‌ش برینداربوو

بۆمبه‌كه‌ نزیك ئه‌و شوێنه‌ بووه كه‌ مه‌فره‌زه‌كانی پۆلیسی فریاكه‌وتنی كه‌ركووك لێی ده‌وه‌ستن

له‌ ئه‌نجامی ته‌قینه‌وه‌ی بۆمبێكی چێندراو له‌ سه‌نته‌ری شاری كه‌ركووك پۆلیسێك شه‌هید و یه‌كی دیكه‌ش برینداربوو. 

دوانیوه‌ڕۆی ئه‌مڕۆ هه‌ینی له‌ نزیك مزگه‌وتی عه‌بدوڵڵای گه‌ڕه‌كی په‌نجاعه‌لی شاری كه‌ركووك، بۆمبێكی چێندراو به‌ ئۆتۆمبێلێكی هێزه‌كانی پۆلیس دا ته‌قییه‌وه‌ و له‌ ئه‌نجامدا پۆلیسێك شه‌هیدبوو و یه‌كی دیكه‌ش برینداربوو.

به‌ گوێره‌ی زانیارییه‌كان، بۆمبه‌كه‌ له‌ ژێر تانكی گازی مۆلیده‌یه‌كی ئه‌هلی گه‌ڕه‌كه‌كه‌ ته‌قیوه‌ته‌وه‌ و نزیك ئه‌و شوێنه‌ بووه كه‌ مه‌فره‌زه‌كانی پۆلیسی فریاكه‌وتنی كه‌ركووك لێی ده‌وه‌ستن. 

هه‌ر به‌ گوێره‌ی زانیارییه‌كان له‌و ته‌قینه‌وه‌یه‌دا پۆلیسێكی كورد شه‌هیدبوو و یه‌كی دیكه‌ش برینداربوو به‌ ناوی كاروان عوسمان یاسین و زیانی ماددیش بەر شوێنی تەقینەوەکە کەوتووە‌. 

دوای ته‌قینه‌وه‌كه‌ پۆلیسی پووچه‌ڵكردنه‌وه‌ی مین گه‌یشتووه‌نه‌ته‌ شوێنی رووداوه‌كه‌ و بۆ ئه‌وه‌ی دڵنیاببنه‌وه‌ له‌وه‌ی كه‌ هیچ مینێكی دیكه‌ له‌ شوێنه‌كه‌ بوونی نییه‌.