لیژنه‌ى په‌یوه‌ندییه‌كان به‌دواداچوون بۆ كێشه‌ و گرفتى په‌نابه‌رانى كورد له‌ وڵاتى یۆنان دەکات

بریاریان دا به‌م نزیكانه‌ سه‌ردانى کۆنسوڵخانه‌ى وڵاتى یۆنان بكه‌ن


ئه‌مڕۆ دووشه‌ممه‌ 2/12/2019 لیژنه‌ى په‌یوه‌ندیه‌كان ڕه‌وه‌ندى كوردستانى  كۆبوونه‌وه‌ى ئاسایى خۆى ئه‌نجامدا.

كۆبوونه‌وه‌كه‌ به‌ سەرپەرشتی د. ڕێبوار بابكه‌یى سەرۆکی لێژنە و به‌ ئاماده‌بوونى جێگری سه‌رۆك و بریارده‌رى لیژنه‌ و ئه‌ندام و رٍاوێژكارانى لێژنەکە له‌ هۆڵى لیژنه‌ له‌ ته‌لارى په‌رله‌مان به‌رێوه‌چوو.

سه‌ره‌تای كۆبوونه‌وه‌كه‌ به‌ خوێندنه‌وه‌ى چه‌ند ڕاپۆرت و نوسراوێك ده‌ستیپێكرد كه‌ تایبه‌ت بوون به‌ كار و چالاكى لیژنه‌، دواتر ته‌وه‌رى سه‌ره‌كى كۆبوونه‌وه‌ تاوتوێكرا کە تایبه‌ت بوو بەڕه‌وشى په‌نابه‌رانى كورد له‌ وڵاتى یۆنان دواى گفتوگۆكردنى ئه‌م بابه‌ته‌ له‌ لایه‌ن ئه‌ندامانى لیژنه‌ به‌  مه‌به‌ستى  وه‌رگرتنى زانیارى زیاتر و به‌دواداچوونى كێشه‌ و گرفتى په‌نابه‌رانى كورد له‌و وڵاتى یۆنان و چۆنیه‌تى چاره‌سه‌ركردنى كێشه‌كانیان بریاریان دا به‌م نزیكانه‌ سه‌ردانى کۆنسوڵخانه‌ى وڵاتى یۆنان بكه‌ن و دواتر  یاداشتێك له‌ سه‌ر پرس و كێشه‌ى په‌نابه‌رانى كورد له‌ وڵاتى یۆنان ئاراسته‌ى سه‌رۆكایه‌تى په‌رله‌مان بكرێت.

لەمبارەیەوە د.ڕێبوار بابکەیی سەرۆکی لێژنەی پەیوەندییەکان و رەوەندی کوردستانی لە لێدوانێکیدا بۆ ماڵپەری پەرلەمانی کوردستان روونکردنەوەی زیاتری خستەڕوو.