عادل عه‌بدولمه‌ھدی: ده‌بێت چه‌ك ته‌نھا له‌ژێر ده‌سه‌ڵاتی ده‌وڵه‌ت بێت

ناتوانرێت ھیچ قه‌واره‌یه‌كی ناشه‌رعی له‌ده‌ره‌وه‌ی شه‌رعیه‌تی ده‌وڵه‌ت قبوڵ بكرێت

عادل عه‌بدولمه‌ھدی رایگه‌یاند ناتوانرێت ھیچ قه‌واره‌یه‌كی ناشه‌رعی له‌ده‌ره‌وه‌ی شه‌رعیه‌تی ده‌وڵه‌ت قبوڵ بكرێت، جه‌ختی له‌وه‌ش كرده‌وه‌ كه‌ ده‌بێت چه‌ك ته‌نھا له‌ژێر ده‌سه‌ڵاتی ده‌وڵه‌ت بێت.

عادل عه‌بدولمه‌ھدی ، سه‌رۆكوه‌زیرانی عێراق و فه‌رمانده‌ی گشتیی ھێزه‌ چه‌كداره‌كان، له‌ گوتارێكدا له‌ زانكۆی به‌رگریی بۆ توێژینه‌وه‌ی سه‌ربازیی له‌ به‌غدا گوتی: كاری له‌پێشینه‌ی حكوومه‌ت پاراستنی مافی سه‌رجه‌م عێراقییه‌كانه‌ له‌ژێر سایه‌ی یاسا و ئاسایش و سیسته‌مدا.

ھه‌روه‌ھا گوتی: به‌رنامه‌ی حكوومه‌ت روونه‌ و دیاریمان كردووه‌ له‌ به‌ره‌نگاربوونه‌وه‌ی گه‌نده‌ڵی و مانه‌وه‌ی چه‌ك به‌ته‌نھا له‌ژێر ده‌سه‌ڵاتی ده‌وڵه‌ت و پشتیوانی توانای ھێزه‌ چه‌كداره‌كان، ھه‌روه‌ھا به‌كارھێنانی په‌یوه‌ندییه‌كانی ده‌ره‌وه‌ له‌به‌رژه‌وه‌ندی ئاسایش و سه‌قامگیری و گه‌شه‌پێدانی ئابووری وڵات.

سه‌رۆكوه‌زیرانی عێراق جه‌ختی كرده‌وه‌ له‌وه‌ی كه‌یه‌ك ده‌وڵه‌ت ھه‌یه‌ ئه‌ویش عێراقه‌، گه‌لیش سوپای راسته‌قینه‌ی وڵاته‌، ھیچ بژارده‌یه‌كی تر نییه‌ جگه‌ له‌ پشتیوانیكردنی ھێزه‌ چه‌كداره‌كان.

 گوتیشی : ناكرێت ھیچ قه‌واره‌یه‌كی ناشه‌رعی یان چه‌ك له‌ده‌ره‌وه‌ی شه‌رعیه‌تی ده‌وڵه‌ت قبوڵ بكرێت.