حه‌سه‌ن روحانی: نابێت رێگه‌ به‌ تێكچوونی ئارامی ئێران بدرێت

سه‌رۆك كۆماری ئێران باس لە هۆكارەكانی گرانكردنی بەنزین دەكات


سه‌رۆك كۆماری ئێران له‌باره‌ی خۆیشاندانی وڵاته‌كه‌یه‌وه‌ رایگه‌یاند، ناڕه‌زایی مافی خه‌ڵكه‌ به‌ڵام ده‌بێت له‌ كاری تێكده‌رانه‌ جیابێت و نابێت رێگه‌ به‌ تێكچوونی ئارامی ئێران بدرێت.

حەسەن روحانی سەرۆكی ئێران لە رێگەی تەلەفزیۆنەوە پەیامێكی ئاراستەی گەلی ئێران كرد و باسی لە هۆكارەكانی گرانكردنی بەنزین كرد.

روحانی لە وتەیەكدا رایگەیاند كە بەهۆی دۆخی ئێرانەوە سێ بژاردە لە بەردەستیاندا بوو، ئەوان یەكیان هەڵبژارد كە گرانكردنی بەنزینە.

روحانی گوتی: دەبوو لە نێوان زیادكردنی باج یان هەناردەكردنی نەوتی زیاتر و گرانكردنی بەنزین یەكیان هەڵبژێرین.

رۆحانی رونیشیکردەوە، ئەگەر نرخی بەنزینیان بەرزنەکردایەتەوە، دەبوو لەماوەی دوو ساڵی ئایندەدا هاوردەیان بکردایە، ئەوەش زیانی بەئابووری وڵاتەکەیان دەگەیاند.

سەرۆكی ئێران گوتیشی: ناڕەزایەتی لە جێی خۆیدایە، بەڵام نابێت كاری تێكدەرانە ئەنجام بدرێت و هێرش بكرێتە سەر كەلوپەلی گشتی.

هەروەها روحانی باسی لەوە كرد كە ئەوان لە رۆژی دووشەممەوە دەست دەكەن بە دابەشكردنی هاوكاری بەسەر خەڵكی هەژار و كەم دەرامەتی ئێران.

ماوەی دوو رۆژە خۆپیشاندان لە تارانی پایتەخت و چەندین شاری دیكەی ئێران بەردەوامە، ئەوەش بەهۆی گرانبوونی نرخی بەنزین، كه‌ حكومه‌تی تاران بڕیاریداوه‌ بۆ سێ هێنده‌ به‌رزی بكاته‌وه‌.