لێژنەی شەهیدان چەند بڕیارێکی گرنگی دا

تایبه‌ت به‌کێشە و گرفتەکانی بەردەم کەسوکاری شەهیدان و زیندانیانی سیاسی


لێژنەی شەهیدان و قوربانیانی جینۆساید و زیندانیانی سیاسی له‌په‌رله‌مانى كوردستان بڵاوی كرده‌وه‌ كه‌ بەمەبەستی دانانی پلانی سترتیژی بۆ لێژنەکەیان و بە دواداچوون بۆ کێشە و گرفتەکانی بەردەم کەسوکاری شەهیدان و زیندانیانی سیاسی،لێژنەكه‌ بە سەرپەرشتی سوسن محمد میرخان سەرۆکی لێژنە و جێگری سەرۆک و بڕیاردەر و ئەندامان و ڕاوێژکارانی لێژنە کۆبوونەوە.

راشیده‌گه‌یه‌نن ، لە کۆبوونەوەکەدا سەرجەم ئەو نووسراوانەی ئاراستەی لێژنەکەیان کرابوو تاوتوێکران و وەڵامی پێویستیان درایەوە، پاشان گفتۆگۆ لەسەر تەواوی ئەو خاڵانە کرا کە پێویستە لە پلانی ستراتیژی لێژنەی شەهیدان دابنرێت و هەموو ئەندامان تێبینی و سەرنجەکانی خۆیان لەبارەیەوە خستەڕوو،  بڕیاریاندا چەند لێژنەیەکی بچووکراوە دروست بکەن بە مەبەستی بەدواداچوون بۆ کێشە و گرفتەکانی بەردەم کەسوکاری شەهیدان و قوربانیانی جینۆساید و زیندانیانی سیاسی


لێژنەی شەهیدان و قوربانیانی جینۆساید و زیندانیانی سیاسی له‌په‌رله‌مانى كوردستان  ئاماژه‌ به‌وه‌ش ده‌كات كه‌ هەر لە کۆبوونەوەکەدا  بڕیاردرا هەردوو یاسای ماف و ئیمتیازاتی کەسوکاری شەهیدان،و زیندانیانی سیاسی بە هەماهەنگی لەگەڵ وەزارەتی شەهیدانی حکومەتی هەرێمی کوردستان هەمووار بکرێنەوە و کەم و کوڕیەکانیان چارەسەر بکرێن و زیاتر لە خزمەتی کەسوکاری شەهیدان و قوربانیانی جینۆساید و زیندانیانی سیاسی دابێت.

له‌كۆتادا رایده‌گه‌یه‌نن تەوەرێکیتری کۆبوونەوەکە تایبەت بوو بە فیدباک بەو کارانەی لە ماوەی ڕابردوو لێژنەکە ئەنجامیان داوە و دەرئەنجامەکانی خرانە ڕوو، هاوکات بڕیاریاندا پەیوەندی و هەماهەنگی تەواویان هەبێت بەو وەزارەتانەی کە پەیوەندیدارن بە کاروباری کەسوکاری شەهیدان و زیندانیانی سیاسی، مەسەلەی ئاسانکاری خوێندنی کوڕ و کچی کەسوکاری شەهیدان و زیندانیانی سیاسی بەشێکیتری کۆبوونەوەکە بوو


راشیده‌گه‌یه‌نن له‌كۆبوونه‌وه‌كه‌دا بریاریانداوه‌ كه‌بە ڕاپۆرتێک سەرۆکایەتی پەرلەمانی کوردستان لە ناوەڕۆکی کۆبوونەوەکە ئاگادار بکەنەوە.

شوان عه‌زیز