ئه‌مریكا هانى عێراق ده‌دات بۆ هه‌ڵبژاردنى پێشوه‌خته‌ و داوا ده‌كات توندوتیژى له‌ دژى خۆپیشانده‌ران رابگرن

كۆشكى سپى رایگه‌یاند

به‌پێى هه‌واڵێكى سپوتنیكى روسى، كۆشكى سپى رایگه‌یاند: واشنتۆن به‌ راستى نیگه‌رانه‌ له‌سه‌ر بارودوخى عێراق و له‌گه‌ڵ به‌ڕێوه‌چوونى هه‌ڵبژاردنى پێشوه‌خته‌ن له‌ عێراق و هانى حكومه‌تى عێراقى داوه‌ ده‌ست به‌ هه‌ڵبژاردنى پێشوه‌خته‌ بكه‌ن و توندوتیژى دژى خۆپیشانده‌ران رابگرن. 

كۆشكى سپى راگه‌یه‌ندراوێكى له‌باره‌ى دۆخى عێراق و خۆپیشانده‌رانى شاره‌كانى باشوور و ناوه‌ڕاستى عێراق بڵاوكرده‌وه‌ و نیگه‌رانى خۆیان به‌رامبه‌ر توندوتیژى خۆپیشانده‌ران ده‌ربڕى. 

له‌ راگه‌یاندراوه‌كه‌دا هاتووه‌ ئه‌مریكا هاوكارى شاندى نه‌ته‌وه‌ یه‌كگرتووه‌كان ده‌كات كه‌ به‌ ئه‌ركى یارمه‌تیدان له‌م دۆخه‌ى به‌سه‌ر عێراقدا هاتووه‌ و داواى له‌ حكومه‌تى عێراق كردووه‌ و توندوتیژى دژى خۆپیشانده‌ران رابگیرێت و به‌ڵێنى به‌رهه‌م سالح سه‌رۆك كۆمارى عێراق به‌جێ بهێنێت تا چاكسازی و هه‌ڵبژاردنى پێشوه‌خته‌ ئه‌نجام بدرێت.

جێى ئاماژه‌پێدانه‌ له‌ سه‌ره‌تاى مانگى تشرینى یه‌كه‌مى 2019، خۆپیشاندان له‌ به‌غدا و چه‌ندین پارێزگاى دیكه‌ ده‌ستیپێكردووه‌ دژى گه‌نده‌ڵى و نه‌بوونى هه‌لى كار و كه‌مى خزمه‌تگوزارى و باشكردنى بژێوى خه‌ڵك و به‌ڕێوه‌چوونى هه‌ڵبژاردنى پێشوه‌خته‌.

به‌گوێره‌ى هه‌واڵی كۆمسیونى باڵاى نه‌ته‌وه‌ یه‌كگرتووه‌كان بۆ مافى مرۆڤ تا ئێستا 300 كه‌س كوژراون و نزیكه‌ى 15 هه‌زاریش برینداربوون له‌سه‌ر ده‌ستى هێزه‌ ئه‌منییه‌كان و له‌زۆر شوێنى به‌غدا و شاره‌كانى دیكه‌ هاتوچۆ قه‌ده‌غه‌یه‌ و هێلى ئینته‌رنێت بڕاوه‌. 


ئاماده‌كردن و وه‌رگێڕان/ سیروان عه‌زیز