ستیڤن مونشین: ئه‌مریكا فشاره‌كانى بۆ سه‌ر ئێران زیاد ده‌كات

ستیڤن مونشین وه‌زیرى گه‌نجینه‌ى ئه‌مریكا

به‌پێى هه‌واڵێكى رۆیته‌رز، دوێنێ دووشه‌ممه‌ 28ى تشرینى یه‌كه‌مى 2019، ستیڤن مونشین وه‌زیرى گه‌نجینه‌ى ئه‌مریكا، له‌ میانه‌ى سه‌ردانێكیدا بۆ رۆژهه‌ڵاتی ناوه‌ڕاست و سه‌ردانیكردنى هاوپه‌یمانه‌كانى ئیسرائیل و سعودیه‌ رایگه‌یاند: ئه‌و سزایانه‌ى خراونه‌ته‌ سه‌ر ئێران ئه‌نجامیان هه‌بووه‌.

ستیڤن مونشین وه‌زیرى گه‌نجینه‌ى ئه‌مریكا له‌ ئۆرشه‌لیم شان به‌شانى بنیامین نه‌تانیاهۆى سه‌رۆك وه‌زیرانى ئیسرائیل به‌ رۆژنامه‌نووسانى راگه‌یاند: "به‌رده‌وام ده‌بین له‌سه‌ر فشاره‌كانمان بۆ سه‌ر ئێران و به‌رده‌وام ده‌بین له‌سه‌ر زیادكردنى ئه‌و فشارانه‌". 

هه‌روه‌ها ئاماژه‌ى به‌وه‌شكرد وڵاته‌كه‌ى به‌رزترین رێژه‌ى سزاى به‌سه‌ر ئێراندا سه‌پاندووه‌ و تا ئێستا كاریگه‌رى هه‌بووه‌ به‌سه‌ر ئێران، له‌ درێژه‌ى قسه‌كانیدا مونشین به‌ نه‌تانیاهۆى گوت، "هه‌ر ئه‌مڕۆ له‌گه‌ڵ تیمه‌كه‌تدا له‌ كارێكى به‌رهه‌مداره‌وه‌ هاتووم و ئه‌وان كۆمه‌ڵه‌ بیرۆكه‌یه‌كى زۆر دیاریكراویان به‌ ئێمه‌ داوه‌ و به‌دوایدا ده‌چین و لێكۆڵینه‌وه‌ى له‌سه‌ر ده‌كه‌ین".

هاوكات بنیامین نه‌تانیاهۆ سوپاسى ستیڤنى كرد و پێی گووت،" من سوپاست ده‌كه‌م بۆ ئه‌وه‌ى كردووته‌ و هانت ده‌ده‌م له‌ چوارچێوه‌ى ئه‌و كارانه‌دا زیاتر و زۆر زیاتر هه‌وڵ بده‌یت".

جێى ئاماژه‌پێدانه‌ له‌وكاته‌وه‌ى ویلایه‌ته‌ یه‌كگرتووه‌كانى ئه‌مریكا بڕیارى كشانه‌وه‌ى له‌ رێككه‌وتنى ئه‌تۆمى دا له‌ ساڵى 2015ى نێوان وڵاته‌ زڵهێزه‌كان و ئێران، واشنتۆن هه‌وڵى سزادانى ئێرانى داوه‌ چه‌ندین سزاى به‌سه‌ر ئێراندا سه‌پاندووه‌ و ناردنى نه‌وتى ئێرانى سنوورداركردووه‌ زیانێكى زۆر به‌ ئابوورى ئه‌و وڵاته‌ گه‌یشتووه‌.


ئاماده‌كردن و وه‌رگێڕان/ سیروان عه‌زیز