هه‌موو پاڵاوگه‌ نایاساییه‌كانی كوردستان داخراون

ئه‌وانه‌شی ئێستا ڕێگەیان پێ دراوە کاربکەن مەرجی قورسیان بەسەردا سەپێندراوە

ھەموو پاڵاوگەی نه‌وتییانه‌ی كه‌ له‌ ھەرێمی کوردستان مەرجی یاساییان تێدا نەبووە و داخراون له‌ ئێستادا تەنیا 30 پاڵاوگە ماون.

له‌مباره‌یه‌وه‌ گولیزار ڕەشید، جێگری سەرۆکی لیژنەی سامانە سروشتییەکانی پەرلەمانی کوردستان بە ماڵپەڕی فەرمیی پارتی دیموکراتی کوردستانی ڕاگەیاند: "بە بڕیاری حکوومەتی ھەرێمی کوردستان، ھەموو پاڵاوگە نایاسایییەکانی سەرتاسەری ھەرێمی کوردستان داخراون و تەنیا ئەو پاڵاوگانەی بەپێی مەرجەکانی حکوومەت کار دەکەن، ماون، ئەوانیش ئەگەر مەرجەکانی لایەنە پەیوەندارەکان جێبەجێ نەکەن، دادەخرێن و ڕێگە نادرێت بە ھیچ شێوەیەک پاڵاوگەی نایاسایی و بێمەرج بکرێتەوە." 

پێشتر لە ھەرێمی کوردستان 200 پاڵاوگە ھەبوون، بەڵام زۆربەیان مەرجی پاڵاوگەیان تێدا نەبووە و داخراون، ئه‌وانه‌شی ئێستا ڕێگەیان پێ دراوە کار بکەن، مەرجی قورسیان بەسەردا سەپێندراوە. 

بە وتەی جێگری سەرۆکی لیژنەی سامانە سروشتییەکان، پاڵاوگە نایاسایییەکان سەرچاوەی چەندین نەخۆشیی کۆشندەن و ھۆکارێکی سەرەکین بۆ پیسبوونی ژینگەی ھەرێمی کوردستان، لەبەر ئەوەش، ڕێگەی کارکردنیان پێ نادرێت.