سه‌رۆك وه‌زیرانی لوبنان داوای یارمه‌تی به‌په‌له‌ له‌ ئه‌مه‌ریكاو فه‌ره‌نسا ده‌كات

گرژییه‌كانی نێوان حزبوڵڵای لوبنانی و ئیسرائیل په‌ره‌ده‌سێنن


به‌هۆی گرژییه‌كانی ئه‌مڕۆی نێوان حزبوڵڵای لوبنانی و ئیسرائیل له‌ سه‌ر سنووری نێوان ئه‌و دوو وڵاته‌، سه‌عد حه‌ریری، سه‌رۆك وه‌زیرانی لوبنان له‌ دوو په‌یوه‌ندی ته‌له‌فۆنی جیاوازدا داوای یارمه‌تی له‌ هه‌ریه‌ك له‌ واشنتن و پاریس كرد.

له‌ په‌یوه‌ندییه‌ ته‌له‌فۆنییه‌كانیدا له‌گه‌ڵ هه‌ریه‌ك له‌ مایك پۆمپێیۆ، وه‌زیری ده‌ره‌وه‌ی ئه‌مه‌ریكا و ئیمانوێل بون، راوێژكاری ئیمانوێل ماكرۆن، سه‌رۆكی فه‌ره‌نسا، حه‌ریری داوای له‌ ئه‌مه‌ریكا، فه‌ره‌نسا و كۆمه‌ڵگای نێوده‌وڵه‌تیش كرد، بۆ وه‌ستاندنی گرژییه‌كان و رێگریكردن له‌ ئاڵۆزتربوونی دۆخه‌كه‌، به‌ په‌له‌ بێنه‌ سه‌ر هێڵ.

ئه‌مه‌ دوای ئه‌وه‌ هاتووه‌ ئه‌مڕۆ حزبوڵڵای لوبنانی رایگه‌یاند، ئۆتۆمبێلێكی سه‌ربازیی ئیسرائیلیان كردووه‌ته‌ ئامانج و له‌ ئاكامیشدا، سه‌ربازێك كوژراوه‌ و یه‌كێكی دیكه‌ش برینداربوو.

به‌ گوێره‌ی راپۆرته‌ میدیاییه‌كان، حزبوڵڵا چه‌ند مووشه‌كێكی ئاراسته‌ی ناو خاكی ئیسرائیل كردووه‌.

سوپای ئیسرائیلیش رایده‌گه‌یه‌نێت، پێگه‌كانی حزبوڵڵایان بۆردومان كردووه‌ و وه‌ڵامی سه‌رچاوه‌ی هێرشه‌كانیشیان داوه‌ته‌وه‌.