به‌رپرسێكی وه‌زاره‌تی ده‌ره‌وه‌ی ئه‌مریكا تۆمه‌ته‌كانی حه‌شدی شه‌عبی ره‌تده‌كاته‌وه‌

سه‌باره‌ت به‌ ته‌قینه‌وه‌ی چه‌ند كۆگایه‌كی چه‌ك و ته‌قه‌مه‌نی

كاربه‌ده‌ستێك له‌ وه‌زاره‌تی ده‌ره‌وه‌ی ئه‌مه‌ریكا ئه‌و تۆمه‌تانه‌ی حه‌شدی شه‌عبی ڕه‌تكرده‌وه‌ كه‌ دوێنێ چوارشه‌ممه‌ له‌ به‌یاننامه‌یه‌كدا بڵاویكردبووه‌وه‌ سه‌باره‌ت به‌ ته‌قینه‌وه‌ی چه‌ند كۆگایه‌كی چه‌ك و ته‌قه‌مه‌نی حه‌شد.

كاربه‌ده‌سته‌كه‌ له‌ لێدوانێكی بۆ كه‌ناڵی ئه‌لحوڕه‌ گوتی: ئه‌مه‌ریكا ڕێز له‌ سه‌روه‌ری عێراق ده‌گرێت و بوونی ئه‌مه‌ریكا له‌و وڵاته‌ له‌سه‌ر بانگهێشتی حكومه‌تی عێراقه‌ و به‌پـێی یاسا و ڕێساكانیه‌تی.

كاربه‌ده‌سته‌كه‌ داوایكرد له‌ بری ئه‌مه‌ریكا پـرسیار له‌ حكومه‌تی عێراق بكرێت سه‌باره‌ت به‌و زانیاریـیانه‌ی له‌ به‌یاننامه‌كه‌ی حه‌شدی شه‌عبیدا هاتوون.

پـێشتر حه‌شدی شه‌عبی له‌ به‌یاننامه‌یه‌كدا نووسیویه‌تی: زانیاری هه‌یه‌ ئه‌مه‌ریكا له‌ ئه‌مساڵدا 4 فڕۆكه‌ی بێ فڕۆكه‌وانی ئیسرائیلیان له‌ ڕێگه‌ی وڵاتی ئازربیجانه‌وه‌ هێناوه‌ تاوه‌كو له‌ نێو فڕۆكه‌كانی هێزی ئه‌مه‌ریكا كاربكه‌ن بۆ چاودێریكردنی باره‌گاكانی حه‌شد و كۆكردنه‌وه‌ی زانیاری سه‌باره‌ت به‌ كۆگاكانی چه‌ك و ته‌قه‌مه‌نی.

سه‌رچاوه‌ / ده‌نگی ئه‌مریكا