توركیا بۆ هه‌نارده‌ كردنه‌وه‌ی هێلكه‌ هانا بۆ عێراق ده‌بات

زیانێكی زۆر له‌قه‌ده‌غه‌كردنی هه‌نارده‌ی هێلكه‌ بۆ عێراق به‌ركه‌وتووه‌

باڵیۆزی توركیا له‌به‌غدا فاتیح یڵدز داخوازییه‌كانی به‌رهه‌مهێنه‌رانی هێلكه‌ی له‌ توركیا گه‌یانده‌ وه‌زیری كشتوكاڵی عێراق ساڵح حه‌سه‌ن و بۆ ئه‌و مه‌به‌سته‌ش ناوبراوی بانگهێشتی توركیا كرد.

یڵدز له‌ تۆڕی كۆمه‌ڵایه‌تی تویته‌ر و له‌هه‌ژماری خۆیدا رایگه‌یاندووه‌ له‌ سه‌ردانێكدا بۆ لای وه‌زیری كشتوكاڵی عێراق باسیان له‌ هارییه‌كارییه‌كانی هه‌ردوو وڵاتی توركیا عێراق كردووه‌ له‌بواری ئاژه‌ڵداری و كشتوكاڵیدا.

یڵدز چاوه‌ڕوانییه‌كانی توركیای له‌دوای قه‌ده‌غه‌ كردنی هاورده‌ی هێلكه‌ی توركی گه‌یاندۆته‌ ئه‌و وه‌زیره‌ و ئاشكرای كردووه‌ كه‌ توركیا چاوه‌ڕێیه‌ رێگه‌ی هه‌نارده‌ی هێلكه‌ سه‌رله‌نوێ بۆ عێراق بكرێته‌وه‌.

یڵدز بانگهێشتێكی وه‌زیری كشتوكاڵ و دارستانی توركیا به‌كر پاكده‌میرلی و به‌رهه‌مهێنه‌رانی هێلكه‌ گه‌یاندۆته‌ وه‌زیره‌ عێراقییه‌كه‌.