فڕۆكه‌ جه‌نگییه‌كانی توركیا گوندی بۆلێی سه‌ر به‌ ناحیه‌ی سه‌نگه‌سه‌ریان بۆردوومان كرد

به‌هۆی بۆردوومانه‌كه‌وه‌ دوو هاووڵاتی بریندار بوون

به‌یانی ئه‌مڕۆ دووشه‌ممه‌ فڕۆكه‌ جه‌نگییه‌كانی سوپای توركیا گوندی بۆڵێی سه‌ر به‌ ناحیه‌ی سه‌نگه‌سه‌ریان له‌ بناری قه‌ندیل بۆردوومان كرد.

له‌مباره‌یه‌وه‌ په‌یامنێری كوردستان تیڤی له‌ پشده‌ر پێی ڕاگه‌یاندین: دوای ئه‌وه‌ی ماوه‌ی 2 كاتژمێر چه‌ند فڕۆكه‌یه‌كی چاودیری به‌ ئاسمانی سه‌نگه‌سه‌ردا ده‌سوڕانه‌وه‌ و دواتر چه‌ند فڕۆكه‌یه‌كی جه‌نگی گوندی بۆلێی سه‌ر به‌ ناحیه‌ی سه‌نگه‌سه‌ریان كرده‌ ئامانج و بۆردوومانێكی خه‌ستی گونده‌كه‌یان كرد و به‌هۆیه‌وه‌ 2 كه‌س بریندار بوون و زه‌ره‌ر و زیانێكی گه‌وره‌ی ماددی و ماڵیش به‌ر خه‌ڵكی گونده‌كه‌ و باخ و باخات و خانووه‌كانی گه‌یشت.

ڕاشیگه‌یاند: فڕۆكه‌كان به‌ بۆمبی گه‌وره‌ گونده‌كه‌یان بۆمب باران كردووه‌ و هه‌ریه‌ك له‌ " عه‌بدولـڵا ئه‌حمه‌د هۆمه‌ر" ی ته‌مه‌ن 63 ساڵان و " جیهان ئه‌نوه‌ر" كه‌ هاووڵاتی گونده‌كه‌ن بریندار بوون و گوازرانه‌وه‌ بۆ نه‌خۆشخانه‌ی شه‌هید عه‌بدو ڕه‌حیم له‌ سه‌نگه‌سه‌ر بۆ وه‌رگرتنی چاره‌سه‌ر.

شایه‌نی باسه‌ هه‌ر ئه‌مڕۆ فڕۆكه‌ جه‌نگییه‌كانی توركیا ناوچه‌كانی چیای خواكوڕكیان له‌ ده‌ڤه‌ری سیده‌كان بۆردوومان كرد و تا ئێستاش زه‌ره‌ر و زیانه‌كای بۆمبارانه‌كه‌ نه‌زاندراون.